Kokang Hmunhma Ralkap Sakhaan 3 MNDAA Nih An Lak Chap
The Chinland Post | 2023 November 22 — Shan ram chaklei, Kokang hmunhma ah a um mi ralkap sakhaan 3 cu MNDAA nih an lak chap i hriamngan telh in hriam tampi le kuanzen tampi an lak khawh tiah The Kokang Post nih a langhter.
November 20 zinglei ah Ton-shan hmunhma, Ta-cu-chinh tlang hnulei, cuai-pa sakhaan cu MNDAA nih an kah i an lak hnu zaanlei ah Kokang hmunhma sakhaan 3 cu MNDAA nih an lak chap caah ralkap sakhaan a zapi 161 an lak khawh cang tiah theih a si.
November 20 zinglei ah MNDAA nih Hung-shin hmunhma Shan-Thang khuakomh, Cha-lu-caih khua ah hmunhma a khuar mi ralkap sakhaan cu an naih hna i Drone in bom an thlak hna, chun sml 1:40pm hrawng ah MNDAA nih vawlei lei in an kah chap hna i chun sml 1:59 hrawng ah sakhaan an lak beh. Kahdohnak chung in Machine Gun 1, bom 33, RPG zen 25 an lak khawh tiah theih a si.
Cu ni zinglei sml 10:00am hrawng ah MNDAA nih Shi-Shan hmunhma Shauk-kai khua, Phauk-Lauk-Taw tlang ah hmunhma a khuar mi ralkap sakhaan an kah chap i Drone le kekal ralkap hna nih nikhat chung ah voi 3 kahdohnak an tuah i zaanlei sml 4:15pm hrawng ah an lak.
November 20 zaanlei sml 4:30pm hrawng ah MNDAA nih Shin-wan hmunhma, Shin-hua, Shauk-tin-pa hmunhma ah a um mi ralkap sakhaan an rak lak cang i hriamngan ṭhaṭha zong an lak.
Cun Theinni peng, November 20 zinglei sml 5:45am in 8:43am tiang MNDAA nih Mupan pengkomh, Nan-pung hmunhma ah a um mi ralkap Battalion 291 sakhaan cu voi 3 an kah tiah theih a si.
About The Author
