Ks. Sing 900 Renglo Dih In Carson Thlaan A Thar In An Sak Lai
Salai Biak Za Cung| 2018 February 6| Hakha Carson thlaan cu a hlunh tuk cang caah HBA (Hakha Baptist Association) tawlrelnak he ks. sing 900 renglo dih in a thar an sak lai tiah kan theih.
Carson thlaan cu a hlunh tuk cang caah February 7 thawk in power 7 company nih ks. sing 912 dih in a sak lai.
Hi kong he pehtlai in HBA- GS Rev. J. Nawl Cung Lian nih, “Hi saknak ding caah hin ks. sing 912 dih ding in timhtuah a si. US lei ummi CBC nih ks. sing 650, cun Rev. Sang Fen chungkhar le ramdang um, mi dangdang zong nih bawmhnak an kan pek. Atu ah tangka kan hmuh cangmi zapi hi ks. sing 700 a si. A taangmi cu HBA ramchung in Pathian nih khua a khaan te ko lai ti kan i ruahchan” tiah The Chinland Post ah a chim.
“Carson Thlaan cu February 2-4 tiang nithum chung HBC Khrihfabu in minung 45 nih an theh. Hi chung ah kutzung thiam minung 7 dah ti lo paoh a dang 38 nih alakte in an kan bawmh. Cun Dawrthar mino zong nih February 3 an kan bawmh, February 7 zong ah an kan bawmh rih lai. Hi Carson thlaan cu Power 7 company nih February 7 in sak hram a thawk lai i May thla ah lim ding in a sak lai. Hi Carson thlaan cu kau deuh, dawh deuh, muisam phudang deuh le a chung tiang thlacam le pumh khawhnak tiang in an sak lai” tiah HBA Cazi- Pu Duh Ling nih The Chinland Post ah a chim. +++
About The Author
