“Lamkip in Naypitaw ah”
Salai Mangpau | 2023 August 19 —
SAC Headquarters umnak Naypitaw he meng 30 hlawng aa hlatnak Pyinmana peng um tlangcung ralkap sakhaan cu PDF le ṭangrual phu hna nih an kah. Mah kahnak ah Tandaung chaklei (special area) Mipi ralkap bu 1004 battalion (Shan thlanglei Phekhone tit ceih) pawl an si. SAC ralkap 10 an thi i, meithal zuun 9 an lak khawh. Mipi ralkap 3 zong an nunnak a liam ve.
“Lamkip in Naypitaw ah” timi Operation pi cu NUG Defence Minister U Ye Mon nih thawngthanhnak a tuah hnu cun, Naypitaw pawngkam ah kahdohnak a um colh. Ralhrang Headquarter Naypitaw atu bantuk in mipi ralkap lei nih timhciamman tein kahdahnak ah Region Command bu zong dirh a hun si. Battalion 801 in 806 tiang battalion 6, Pah-ka-phah bu, Tantaung chaklei special bu le tamrual phu hna nih an kah hna.
Naypitaw nitlaklei Myotit, Natmouk, Taungdwingyi, Chaklei Tatkon, Yametin, nichuak le Pyinmana, Pinlaung, thlanglei Yedashe lei in Mipi ralkap hna cu ralkap battalion bu hruaining phunglam tein Command tha tang ah ral an tu. Cucaah Naypitaw peng ah bomb buahnak, kahdohnak, sakhaan laknak, Naypitaw Alla ralkap vanlawng tual zong kahdohnak an tuah khawh. Ralhrang lei nih an Headquarter he aa naihniam hmun ah ralkap thazang an hun chap thluahmah ve. Naypitaw peng hmanh ah humhimnak an la kho ti lo.
Naypitaw chung um battalion hna hriamngan hmannak caah fund hmunkip ah an kawl cang. Mipi ralkap lei nih Hriamngan cu chim lo hriamhme meithal in an kah mi hmanh an celh ti lo, harnak an tong ngai cang. Mipi ralkap nih an herh mi kuan/zen hriamnam dongcat lo tein thazang an ngeih khawh peng ahcun ralhrang sakhaan pawl pakhat hnu pakhat an lak khawh thluahmah ko lai.
Burma ram ( U Nu-Ne Win) chan lio ramchung ralbuai/tho lio ah ramri a um mi Burma Communist party headquarter Pangsai (Pangkham), Karen National Union Headquarters hlun Manerplaw, Kachin Independent Organization hlun Pajau tiang kawl cozah nih kah in hnahnawhnak an rak pek khawh.
Khuapau dohthlennak ahcun Myanmar ram ah ral an tho bal lo mi Myanmar hmunlai bik khua hna nih atu cu Naypitaw peng chung ah Mipi ralkap le ṭangrual phu hna nih hnahnawhnak pek in umthiam lo in an kah cang hna.
Mipi ralkap hriamngan hmang kho dirhmun a hun phanh tik cun SAC Northwestern Command umnak Monywa ah kahdohnak a um peng bantuk in Naypitaw zong ah kahdohnak a um peng cang lai. Mah hi, “Lamkip in Naypitaw Ah “ timi raldohnak Operation pi a muisam a vun lang thluahmah ko cang lai.
Cherhchan: PDF Insight
About The Author
