Ma-ha-dat-aa Line A Hmangmi Hakha Le Kalay Telh In Electric Mei Vialte A Mit Dih

City Hunter| 2018 March 12| Hakha le Kalay telh in 66KV (ma-ha-dat-aa) line meitha a hmangmi khua paoh  March 12 zingka in electric mei a mit dih. Atu hi tuanvo ngeitu hna nih an remh cuahmah liopi a si tiah kan theih.

Hakha khuapi hi mei mih le mei rat a tamtuk. Khuapi chung meitung bunh, transformer thlen le remh ruang hrimhrim ah tukar hrawng cu chun karlak ah mei a mit zungzal. Zeiruang ah dah a si hnga tiah The Chinland Post nih Chin ramkulh electric zung lutlai Pu Zo Khai Thawng cu pehtlaihnak kan tuah i atu bantuk in a chim.

Kyaw le Gangaw kar 66KV line mei a rawhnak hmun

“Atu zing khan Kyaw lei in laakmi 66KV line meitha a hmangmi khua Gangaw, Hakha, Thantlang, Falam, Kalay le Khaikam vialte mei a mit dih. Zeiruang ah dah a mih timi rianrangte in kan dothlat colh. Atu cu a rawhnak kan hmuh cang, Kyaw le Gangaw kar ah a si. Tlang mei a kangh ruang ah thingkung a pur i cu nih cun 66KV line mei hri kha a nenh caah mei a dihnak hi a si. Atu hi tuanvo ngeitu pawl nih an remh cuahmah liopi a si.”

“Voidang mei a rawh tawn ahhin khuazei in dah mei a rawh timi kan hngal kho colh tawn lo, a rawhnak kawl te lawng ahhin nikhat hna kan rau tawn. Atu cu chun hlan ah a rawhnak kan hmuh khawh colh caah tuan ah an ser khawh colh ko lai ti ka zumh. Asinain hi a rawkmi ser hi zeitik tiang dah an rauh lai timi le zeitik ah dah mei a rat than lai timi cu ka chim kho lo. A si khawh chung in rianrang ser le mei ratter khawh colh ding cu kan i zuam cuahmah ko. An ser dih cangka in mei kan thlah colh ko lai” tiah a chimchih.

Kyaw le Gangaw kar 66KV line mei a rawhnak hmun

Mei hi zan ah a ra kho than, cu bantuk in a rawkmi ser an lim lo le hmun dangdang in a rawkmi um sual than ahcun zan zong ah rat rih lo khawh a si. Zeitik ah dah a rat lai timi cu a fiang rih lo tiah Chin ramkulh Electric zung in theih a si.
Photo: Zo Khai Thawng facebook

Na ruahning rak langhter ve.. (Leave a comment)

%d bloggers like this: