Malaysia ah tlaih a tong mi Myanmar rammi hna Myanmar ram ah kuat ṭhan dawh an si
The Chinland Post | 2023 January 9 – January 6 zaan ah Malaysia ram, Kuala Lumpur, Jalan Imbi ah minung 1000 leng cu Malaysia palek le Opera Z nih mission pakhat an tuah i an tlaih hna tiah theih a rak si i cu tlaih a tong mi hna chung ah Chin miphun 544 an i tel tiah Malaysia thawngzamh BARNAMA.com nih a ṭial.
Malaysia palek le Lah-Wah-Kah fonh in an tlaih hna i ram thumnak kal kho ding in Refugees Card a chuahpiaktu phu pakhat nih Card a deu pawl a chuak i Card pakhat ah 500 Ringgit in an zuarh hna tiah a langhter.
“Ramdang mi 1,000 leng an tlaih hna, Myanmar, Bangladesh, India, Indonesia, Nepal le Pakistan in aa rak lut mi an tam. Cu chung ah thilsinnung (အထောက်အထား) tling te in a ngei mi cu an thlah ṭhan hna. A ngei lo mi kha an tlaih hna i 544 an tang. Cu chung ah Chin mipun 100 leng Evidence (အထောက်အထား) an ngei lo. Evidence ṭha tein a ngei i UN Card a ngei mi cu an thlah ṭhan hna. Evidence a ngei lo mi an luat khawh nak hnga kan i zuam lio. Refugees Card kan sawk piak hna. An ngeih ahcun an luat kho men. Zeihmanh an ngeih lo ahcun Myanmar ram ah an kuat ṭhan hna lai” tiah Chin miphun zatlang phu rianṭuantu upa pakhat nih Mizzima ah a chim.
Malaysia ram ah phan mi pawl kha an umnak khua cio i zatlang phu nih an min cazin an lak hna i UN Card an ngah khawh nak hna Refugees Card an chuah piak hna i cuticun UN zung ah ralzaam Card ngah ding in an hngak/tlang hna.
“Thawngpang a len bantuk in Malaysia palek le Lah-Wah-Kah nih phunglut lo Card a chuahpiaktu phu an tlaih hna ti mi kha a dik lo. Hika hin cun, peng kip i Community in cazin an lak i Member fee bantuk in kumkhat ah 50 Ringgit lak a si. Card pakhat ah 500 Ringgit in zuar a si lo. Cun atu tlaih a tong mi hna cheukhat hi CDM a tuah mi an um. Anmah pawl kha chikhat cu Bukit Jail ah an hren hna. Vanlawng man tiah minung pakhat ah 900 Ringgit pek a si. Cun Malaysia um Myanmar Embassy in Yangon ah an kuat hna. Cheukhat cu vanlawng man pek ding ngeih lo ruang ah caan saupi hren mi zong an um” tiah an tlaih mi pawl hna a bawmtu pakhat nih Mizzima ah a chim.
Malaysia ram ah phungning tein hmatphungṭin a ngei mi le ram buainak ruang ah dornak nawl a hal mi Myanmar rammi 189,000 leng an um i CDM a tuah mi zong anmah he aa pehtlaihnak Commmunity nih an min an lak hna.
A luancia 2022 October 6 ah Malaysia cozah nih dornak nawl a hal mi Myanmar miphun 160 leng Myanmar ram ah a rak kuat cang hna.
About The Author
