Matupi khua luhchuahnak an phih caah khuami hna harnak an tong
The Chinland Post | 2022 October 7 – Thlanglei Laitlang, Matupi khua ah a luancia September 19 thok in SAC ralkap nih khua luhchuahnak an phih caah Matupi khua ah eidin thilri a phanh lo nak hi zarhthum deng a si cang caah dinei awk a dih lai kha an phang tuk tiah theih a si.
September thla dongh lei ah Matupi khua pawng ah SAC ralkap le CDF-Matupi karlak ah kahdohnak a rak chuah caah atu bantuk in SAC ralkap nih khua luhchuahnak an phih hi a si i khualtlawn nak nawl le thil phorhnak nawl zong rii an khiah tiah theih a si.
Atulio Matupi khua ah datsi/diesel a dih cang i thilman zong a kai tuk tiah khuami nih thawngzamh ah an chim.
Matupi khua luhnak Matupi-Paletwa lam, Matupi-Hakha lam, Matupi-Mindat lam hna ah SAC ralkap nih gate an i ser i mipi umkalnak an rengh tiah theih a si.
Matupi kiangkap kip zong ah SAC ralkap nih thandar a sen tete a bunhnak a um i nifatin ngawt in hriamngan le meithal thawng kan theih tiah khuami hna nih an chim.
A luancia September 19-29 tiang CDF-Matupi le SAC ralkap karlak ah kahdohnak voi 4 a chuak i SAC ralkap 19 an thi, CDF-Matupi hriamtlai pakhat a nunnak a liam tiah CDF-Matupi nih a rak thanh.
About The Author
