Matupi peng kahdohnak ah SAC ralkap 4 an thi
The Chinland Post | 2022 July 12 – Chin ramkulh, Matupi peng, July 11 ah kahdohnak aa peh i SAC ralkap 4 an thi, 2 nak tlawm lo nih hma an tuar tiah CDF-Matupi nih a thanh.
July 11 zinglei sml 10 ah Matupi peng Sawnghti khua le Lungtam khua karlak ah kahdohnak a chuak tiah theih a si. Kahdohnak chungah CDF hriamtlai pawl him tein an kir kho tiah a thanh.
Cun, Matupi peng ah July 6 in kahdohnak aa thok i ni 6 chungah kahdohnak voi 4 a chuak tiah CDF-Matupi nih a thanh.
July 6 ah kahdohnak voi 2 a chuak i SAC ralkap 5 an thi, hliamhma a tuarmi zong an um. July 7 kahdohnak ah SAC ralkap 2 an thi i 6 nak tlawm lo nih hma an tuar tiah theih a si.
Cucaah zarkhat deng Matupi peng kahdohnak ah SAC ralkap 11 nak tlawm lo an thi i hliamhma a tuarmi zong an um.
About The Author
