Mindat-Matupi Lampi Ah Rallam A Sial Mi Ralkap Pawl CDF-Matupi Nih Bomb An Puahhnawh Hna
The Chinland Post | February 3, 2024 — Chin ram, Matupi khua hrambunh Battalion 304 in SAC ralkap 100 hrawng rallam a sial mi cu CDF-Matupi nih bomb an puahhnawh hna i minung 6 hliam an tuar, Chianpian (B) khua cu a ningpi in an khangh tiah CDF-Matupi nih February 2 ah cathanh a chuah.
LIB 304 in SAC ralkap 200 hrawng cu February 1 ni ah Mindat-Matupi lampi cung Chianpian (B) khua lei ah rallam an sial i CDF-Matupi nih bomb an puah hna. February 2 zinglei suimilam 8:00 hrawng ah Chianpian (B) khua cu mei an khangh tiah theih a si.
Sami peng byuha sakhan chuah tak in a rak tli mi SAC ralkap 200 chung in a zatceo hrawng cu Matupi khuapi lei ah an kir cang nain minung 100 hrawng an taan rih caah CDF-Matupi he zeitik caan paoh ah aa kap kho mi an si bantuk in tualchung mi zong nih Matupi-Mindat lampi hman rih lo ding le ram ah kal rih lo ding in CDF-Matupi nih khua mi cu ralrin an pek hna.
Sami khua no.2 SAC ralkap sakhan cu Rakhine ralkap AA le ṭangṭi phu nih January 14 ah an rak lak i Sami khua sakhan chuahtak in a tli mi SAC ralkap 200 hrawng cu Matupi pengkomh lei an kal lio ah Chin mipi ralkap CNA, CDF-Paletwa le CDF-Matupi nih Paletwa peng Bunglai khua pawng ah bawh in an rak kah hna. January 20 ah Dilawngkung khua le Matupi peng Lungpang khua pawng um tiva pakhat ah Chin mipi ralkap nih an kah ṭhan hna i minung 5 an thi. January 21, zinglei suimilam 8:00 am ah Matupi peng Lungpang khua le Sangtak khua kar ah kahdohnak fak ngai in a chuak ṭhan i SAC ralkap 10 nak tlawm lo an thi, hliamtuar mi zong an um.
About The Author
