Mindat peng Hlawwa khua ah hmunhma a khuarmi SAC ralkap nih phungki pawl le khuami an hren hna

The Chinland Post | 2022 September 12 – Chin ramkulh, Mindat peng, Hlawwa khua ah hmunhma a khuarmi SAC ralkap nih phungki le khuami a bu in an hren hna i an phone pawl an chuh hna tiah theih a si.

“Zeiruangdah an hren hna ti ahcun thawngpang a chuah caah an ti. Khuachung an rak luh le cangka in khua phungki sianginn le biakinn ah khuami an khawmh hmasa. Cun an phone pawl an chuh dih hna. An phaknak thawng an thanh sual hna lai ti an phang. Kyaukhtu le Mindat karlak ah a ummi khua a si. Matupi zongah cu bantuk ṭhiamṭhiam in khua an luh ahcun phone an chuh dih hna” tiah Mindat khuapi chung a ummi pakhat nih Mizzima ah a chim.

SAC ralkap pawl cu a luancia September 9 thok in Mindat peng, Hlawwa khua ah hmunhma an khuar caah CDF-Mindat he kahdohnak a chuak.

“Atulio Mindat ah kahdohnak a chuak ṭhan. Khuate lei ah Kyaukhtu in hriamngan an kah, khuapi chung battalion 274 zong nih zaan ah hriamngan a kah lengmang. September 10 zongah Mindat 274 nih hriamngan an kah ruangah Khuihring khua chungah a tla i mipi inn cheukhat an rawk. Zaan ah hriamngan a tlak ruangah khuami hna muilak le ruak lak ah an tlizaam” tiah khuami nih an chim.

SAC ralkap nih Mindat khuapi zong ah zohfelnak an tuah i Mindat in a chuakmi khualtlawng mawṭaw aa citmi pawl phone cu ṭha tein an check tiah theih a si.

“Mi pakhat an check ahhin sm 1 hrawng an rau. Mino cu a zual khun. Anmah sinah Power Bank bantuk seh pakhat te an ngei. Mahte cu phone ah an peh in an check. Phiat cangmi vialte a langh dih ṭhan. Zaanlei ah Yangon kal aa timmi pawl zong an tanh ti lo” tiah khualtlawng pakhat nih Mizzima ah a chim.

Na ruahning rak langhter ve.. (Leave a comment)

%d bloggers like this: