Mone Khua Cu KNU Phufonh Nih An Lak Cang
The Chinland Post | 2023 December 5 — Bago ramṭhen, Nyaunglaybin pengkomh, Kyaukgyi peng, Mone khua ah a um mi ralkap sakhaan vialte cu December 4 zaanlei ah an lak khawh dih cang i thazang 1,500 hrawng in hmunhma zohfelnak kan tuah tiah KNU nih thawng a thanh.
KNU kuttang KNLA le PDF phufonh hna nih December 2 zaanlei thawk in Mone khua ah a um mi ralkap IB 590, IB 599, Myoma palek sakhaan le Ohphyat khuate in Mone khua luhnak gate pawl cu hmakhat te ah an kah hna i December 4 zaanlei ah tlamtling tein an lak khawh hi a si.
Cu Mone khua lak kahdohnak ah kaphnih lei a thi mi an tam i ralkap lei Battalion Commander telh in ralkap tampi nih hriam chiah in a sung an pek tiah KNU nih a chim.
Mone khua hi Naypyitaw lei kalnak lam le KNU nih a tlaihnak Thai-Myanmar ramri tiang a phan mi lam cung ah a um caah kahdohnak an tuah hi a si.
Mone khua ralkap sakhaan pawl kah kan tong timi hi a dik mi a si ko i palek sakhaan kan sung nain kekal ralkap, vanlawng, hriamngan hna bawm in kan doh ve hna tiah Light of Myanmar thawngzamh ah Zaw Min Htun nih a chim.
Shan ram chaklei ah unau hawikom phu nih Operation 1027 an thawk i khuapi lak kahdohnak pawl an tuah cuahmah i Bago ramṭhen chung khuapi an lak hmasa bik hi Mone khua a si.
About The Author
