Monywa Chaung U lam cungah SAC ralkap mawṭaw bom an puah hnawh hna, 8 an thi

The Chinland Post | 2022 September 28 – Sagaing ramṭhen, Monywa peng, Monywa-Chaung U lam cungah mawṭaw a rawk mi pahnih a rak dokmi SAC ralkap mawṭaw bom voihnih an puah hnawh hna i SAC ralkap 8 an thi tiah South Monywa PDF sin in thawng theih a si.

Monywa-Chaung U lam cung September 25 ah mipi hriamtlai nih bom an puah hnawh hna ruangah a rawk i a taang mi mawṭaw 2 cu SAC ralkap mawṭaw 4 in September 27 ah an rak lak hi a si.

PDF phufonh nih September 27 zinglei sml 4:07am ah mawṭaw a rawk mi pahnih a dawkmi SAC ralkap mawṭaw thluan cu Monywa-Chaung U lam ah bomrap lung 3 in a voikhatnak an puah hna.

Cu kahdohnak ah SAC ralkap mawṭaw a pathumnak le a panganak a khen i mawṭaw cungah a ummi SAC ralkap nih RPG in voikhat le meithal pawl an puah sawh tiah theih a si.

Cun adang hmunhma pakhat ah SAC ralkap mawṭaw thluan cu a voihnihnak bom an puah hnawh ṭhan hna i a hnubik mawṭaw a khen i a tap caah adang mawṭaw pakhat nih hri in a dawh tiah PDF South Monywa sin in theih a si.

Cu kahdohnak cu PDF South Monywa, Monywa Ranger Group, Farmers Revolution Force phufonh nih an tuah tiah theih a si.

Na ruahning rak langhter ve.. (Leave a comment)

%d bloggers like this: