Myanmar ralzaam 40,000 leng Mizoram ah an i dor

The Chinland Post | 2022 September 26 – Ralkap nih hramhram in uknak a lak hnu in Mizoram ralzaam camp 60 hrawng ah Myanmar ram in aa rak dormi ralzaam 40,000 leng an um tiah Mizoram Hluttaw palai K. Vanlalvena nih a chim.

Caan karlak sakhaan ah aa dormi pawl hna nih tangka hmuhnak ding zei bantuk rian hmanh ṭuannak nawl an ngei lo i Mizoram cozah nih an herhmi pawl a bawmh ko hna tiah K. Vanlalvena nih The Hindu thawngzamh ah a chim.

Mizoram Chief Minister Zoramthanga le India Prime Minister Narendra Modi Delhi ah tonnak an ngeih lioah Myanmar ram ningkhel tein a si ṭhan khawhnak hnga a herh mi pawl tuah ding in a hal tiah Mr. Vanlalvena nih a chim.

India cu ho lei hmanh ṭan lo ding timi phung aa tlaih bantuk in Kawl ralkap le Ralzaam ho lei hmanh a ṭan lo caah ralzaam buainak kong he pehtlai in Myanmar lei he biaruahnak ngei ding in Mizoram Chief Minister nih a hal.

Mizoram cozah nih ralzaam 30,000 hrawng ralzaam ID Card a chuah piak cang hna i caan karlak ralzaam camp 60 deng zong  a um tiah K. Vanlalvena nih a chim.

Mizoram cozah nih zeibantuk ramdang mi hmanh kha ralzaam an si tiah theihpinak nawl a ngei lo i 1951 lio UN ralzaam kong he pehtlai in hnatlaknak ah India cu min a thu lo tiah India ramchung lei Minister nih a ṭial tiah theih a si.

Mizoram Chief Minister Zoramthanga cu September 22 ah India ramchung lei Minister Amit Shah he tonnak an ngei i Mizoram chung ralzaam kong telh in adang a biapi kong an i ruah tiah theih a si.

Na ruahning rak langhter ve.. (Leave a comment)

%d bloggers like this: