Myanmar Ralzaam Pawl Ṭhawl Ding In India Nih Rianṭuan A Thawk Cang
The Chinland Post | 2024 March 11 — Phungning lo in an rak lut tiah puh in Myanmar ralzaam pawl chung in a phukhatnak cu March 8 ah a ṭhawl hna tiah theih a si.
A luancia zarh thawk in Myanmar ralzaam pawl kirter ding program cu an thawk cang i a ra lai mi ni caan zong ah pehzulh in an ṭuan rih lai tiah nawl ngeitu pawl nih an chim. Atulio dirhmun hi SAC ralkap nih hramhram in uknak a lak hnu thawk in a chuak mi kahdohnak, SAC ralkap nih khuapi, khuate, mipi inn pawl a khangh, vanlawng in bom a thlak ruang ah ramri tan in a zaam mi Myanmar ralzaam hna caah a ngan tak mi harnak a chuahter.
SAC nih hramhram in uknak a lak hnu thawk in India ram ah a zaam mi ralzaam hna chung ah Chin ramkulh in a zaam mi an tam bik. Thantlang khua cu 2021 thawk in SAC nih khuaning in a khangh/hrawh i hmunhma a khuar caah mipi a thongsawm in India ram lei ah an zaam.
India nih ramhnih karlak zalong tein umkalnak nawl phung cu kan hrawh cang lai tiah an thanh hnu zarh tlawmpal a rauh ah atu bantuk in Myanmar ralzaam pawl ṭhawl hram an thawk hna hi a si.
Ṭhawl a tong mi Myanmar ralzaam pawl cu March 9 thawk in India lei ramri khua a si mi Mora an phan cang hna tiah min langhter a duh lo mi upa pakhat nih People’s Spring ah a chim fawn.
India hi 1951 UN Refugee Convention hnatlaknak zul ding min a thu lo mi ram a si.
Phundang in chim ahcun ralzaam pawl covo upatnak pek ding, ṭuanvo lak ding le phungning tein bawmhnak pek ding in biakamnak a tuah lo.
About The Author
