Myanmar Ram Ah Thimnak A Um Kho Lo, A Um Kho Ding Mi Zei A Si
Salai Mangpau | July 20, 2023 |
American hrambunh International Republican Institute in “Election in Burma Aren’t, But Here’s what is” article tial mi chung in lak mi a si.
SAC nih ramchung mipi inn le lo mei a khanghnak, mipi aa thahnak, harnak buainak le sualnak phuntling a tuah ser mi vialte maimilh ṭhan ding in thimnak tuah aa timh hi fiang tein a lang. Cu thimnak cu SAC a lungthlitum lungtak bia a si hlei lo i atu caan ah thimnak zong a tuah kho hleipek lai lo.
An timh bik mi cu Democracy thlennak muisam cuanter in ralkap phu nawlngei peng ding, an uknak hramfeh chin khawhnak hnga ai zuam peng. Sihmahsehlaw nihin ah thimnak cu zanmang bang an lo tlau diam ko caah Democracy dohtlennak ah ramchung mipi vialte phu tampi ṭhenṭhek dih ding ai tim ṭhan hoi.
Ram daihnak tlangtar in hriamtlai he ton biaruahnak a tuah pah lengmang. A sawhsawh men in ton biaruahnak a ser lo. A timh mi thimnak tuah ding ah hriamtlai phu lei nih bawm chan khawhnak lam ser in hriamtlai mi kha Autonomous ( mah le state umnak ah mah tein uk nak nawl) cu SAC nih kan pek hna lai tiah Savo terh in tlangcung hriamtlai sin lemsoinak a tuah.
Mah tiin a tuah lawng ah mipi ralkap thazang a thawngnak hmun Sagaing ram, Magwe ram, Karenni (Kayah) ram, Chinram ah SAC lei nih thazang lak in dohnak fak pi in a tuah kho lai. Nai ah Tuluk (China) tlangtlak piaknak in Myanmar Chaklei hriamtlai phu 3 he ton biaruahnak an tuah. An ceih bik mi cu SAC timhmi Thimnak ah lungtling pi ding a si caah an biaceihnak hmaikal kho lo in an dih ter.
SAC nih aa timh ning tein a kal sual ahcun Khuapau Dohtlen a tuahtu mipi ralkap thazang a zor lai. Sihmahsehlaw aa ruah ning in thil sining lingtelet bak in a um cang.
Nihin ramchung mipi nih democracy dohtlennak cawlcanghnak le thil sining ah SAC uknak pehzulh ding lamthluam ah donkhantu thil tampi a um ruang ah SAC lei in raldohnak thazang chap in fak chinchin in a vun nor cuahmah lio a si. 2023 thlaruk chungah ramchung thianghlimhnak tlangtar he vanral kahnak thazang hman in kahdohnak hmun tampi ah an ralkap tampi a hun chap. Mah ti in kahdohnak thazang a chapnak chan cu thimnak tuahkawhnak ding ah lamthar ka ser mi a si ti langhter duh ah a si.
A ralkap thazang chap in vanral dohnak a tuah ruang ah sualnak ngei lo mipi an thi, mipi inn lo tampi a rawk i sungh zatlaknak a tam cang i mipi thinpang le harnak, ralzaam/khuachuaktak in an tli. Harnak an tong. Khuate tam deuh ah khuami um kho lo in a tuahnak chan cu dohthelnak a tuah tu mipi ralkap kha ei din, fund, hriamnam le ralkap thazang chap kho lo le bawm kho lo in um hna seh ti a duh ruang ah a tuah hi a si ko. Cu tin a tuah ruangah kum hnih le cheu uknak a lak hnu in nu le hngakchia telh in khuami tampi thah an tong.
Buainak a karh caah mipi hunhimnak a um kho ti lo i, rithaisii, phung ning lo chawlehnak a tam, Upadi ning tein biaceihnak a um kho ti lo; Pumpak an tuah mi le an chim mi kha an upadi cu a si ko. Ralkap nih khuachung mipi sin ah phung ning lo in an mah duh paoh in khuakhan lairel an hun tuah. Mipi an thah, Lunghringh mi an tlaih, thong an thlak hna. Ziaza tha lo mi le eihmurnak a tam ngaingai cang.
Cucaah Myanmar ram mipi nih a dik mi Democracy an hmuh khawhnak hnga an duh i nunpek in an au peng mi authawng le an harnak vialte cu vawlei cung ramkip nih theihpi in bawmh an herh cang. American nih “Burma ACT” phunglam an tuah/pom hnu cun phungning tein bawmhnak lam a um cang caah dohtlennak a tuahtu mipi nih teinak an hmuh khawh le harnak an ton mi chung in luatnak lam an hmuh khawh nakhnga bawmh an herh lio caan a si.
SAC ralkap nih vanral dohnak a tuah tik ah kham khawhnak system, thawng hlat khawhnak, SAC chuah tak in CDM a tuah tu hna funtom khawhnak, ERO le NUG karlak funtom kho ding ruahnak pek an herh.
American nih a ngeih mi super power hmang le ramkip fonh in Myanmar democracy cawlcanghnak caah pehtlai in bawm kho peng ding le thazang chuah chin in Myanmram mipi nih an duh mi democracy innka awn piak a herh ko tiah International Republican Institute catial mi” Myanmar Ah Thimnak A Um Kho Lo A Um Kho Ding Mi Zei A Si” chung in lak a si.
About The Author
