Naypitaw He Meng 100 A hlatnak Ralhmun Kahdohnak Kong
Salai Mangpau | 2023 August 12 — 2023 kumcheu chung ah Kyuaktaga peng, Phyu peng, Kyuakkyi peng le Bago ramthen nichuak Sittaung tiva pawngkam hrawng nifatin kahdohnak ah SAC ralkap an tuar ngai cang tiah mipi kahdohnak kong thawngla People Insight nih a langhter.
August 9 ni mipi ralkap nih teinak an hmuh mi Kyauktaga peng, Tamininnkone khua pawng suimilam 11tluk a raumi kahdohnak ah SAC minung 60 ah 30 leng an thi i, Mipi ralkap lei nih hriamnam tampi an lak khawh. Cu Tamininnkone khua August 3 ah kahdohnak a chuak i, SAC ralkap 4 an thi, 4 hliam an pu.
August 5 ni Phyu peng Okphyat khua pawng Sittaung hlei kam ah SAC ralkap cu mipi Sniper nih ralhrang 1 aa kahthah. Ohpyat khua thiam, August 8 ah SAC police sakhan a hnulei hriamngan umnak cu mipi ralkap nih drone in 60mm bom an thlak. Cun Sittaung hlei kam gate zong 40 mm in an kah.
Kyuaktaga peng Nanza khua July 19 ah SAC ralkap 400 operation an kalnak lam ah mipi ralkap nih lamin an orh hna i kartenh in an kah hna caah SAC ralkap 41 leng an thi, 40 hliam an pu.
Nanza khua July 25 ah SAC ralkap 40 leng cu motor lian 1, le motor hme 2 he an rat lio ah mipi ralkap bom ruang ah hliam an tuar fak ngai caah july 26 ah hnu an kir ṭhan. Cu kahnak ah ralkap Captain pakhat telh in 7 an thi, meithal 5 an lak khawh.
Kyuakkyi peng, Poukmaung hlei pawng July 24 ah, Naungkone khua SAC sakhaan gate um ralkap 30 cu mipi ralkap nih an kah hna, ralkap 10 lawng an nung tiah theih a si.
Kyauktakha peng, Taminiinnkone peng, Kyaukkyi peng, SAC ralkap Battalion 264, 307, 308 phu 3 le Kyauktaga peng le Tuhtay kone khua hrambunh SAC ralkap nih hriamngan an kah caah khua mi a thi mi an um.
Naypitaw he meng 100 aa hlatnak kahdohnak a tuah bik mi mipi ralkap phu ah, KNLA, PDF ṭangrual phu an si hna, Kyuakkyi peng kahnak cu KNU brigade 3 umnak, Ngaunglaypin pengkomh a ummi an si.
About The Author
