Paih Bual Ah US Thantar Luhpi Hi Kan Kham Lo; Paih Committee Haotu Pu Chum Ling

City Hunter| 2018 February 18| US ram in a rak tlungmi World Champion cotu Rung Lian Ceu cu Hakha paih tawlreltu committee nih paih bual chung ah US thantar (flag) luhpi le amah duhmi angki, tawhrolh hruk aih ding kong cu an kham lo, an onh ko tiah kan theih.

World Champion cotu Rung Lian Ceu nih, Hakha Chin Miphun Ni aa paih tikah US thantar i ken in luhpi a duh. Cun, i paihnak caah tuahmi angka i hruk lo in tawhrolh tawi le liangbah (amah duhmi uniform) te he i paih a duh tiah kan theih.

Rung Lian Ceu nih paih bual chung ah US thantar luhpi a timhmi cung ah ramchung ramleng Lai media cheukhat mipi cheukhat nih an mawhchiat. Laimi si tung i US thantar luhpi cu Lai miphun a daw lo an ti.

Hi kong he pehtlai in paih tawlreltu phu in haotu Pu Chum Ling cu The Chinland Post nih biahalnak kan ngeih i atu bantuk in a kan leh.

“Rung Lian Ceu nih paih bual chung ah US thantar i ken le luhpi hi paih committee kan kham lo. A duh le Lai thantar zong, US thantar zong i luhpi ko seh. Cu bantuk in midang zong nih an duh ahcun Lai thantar i ken in an i luhpi cio khawh ve ko. Cun, Rung Lian Ceu hi a pumrua a ngan tuk caah angki le tawhrolh kan sermi hi a hruk zong aa hruk kho maw? Cucaah, kanmah nih kan serchuahmi paihnak angki theng si lo in amah duhmi angki le tawhrolh kha zalongte in aa hruk aih kho ko. Paih committee nih kan kham lo, kan onh ko. Amah belte, i paihnak caah a donkhantu thil, a zohchia tuk mi belte cu hrial ah a tha.”

Rung Lian Ceu zong nih US thantar luhpi hi a sualnak a um lo, miphun dawt lo zong a si lo. Zalonnak ka ngeihmi te a si ko a ti ve. Rung Lian Ceu nih US thantar luhpi a duhnak pakhat cu US ah World Champion a cotu a si ruang le US ram in a rak tlungmi a si ruang ah a si tiah kan theih.

Rung Lian Ceu hi US ahcun amah a tei khotu an um rih lo. Voi 10 aa pai i voi 8 bual a co cangmi a si.

Na ruahning rak langhter ve.. (Leave a comment)

%d bloggers like this: