Paletwa peng ah awnmi mipi sianginn pawl bawmhnak an herh
The Chinland Post | 2022 August 23 – Thlanglei Laitlang, Paletwa peng ah Federal fimcawnnak in a kalmi caan karlak mipi hrambunh fimcawnnak cu khuate 60 leng ah a tak in ṭuan a si cang i harnak tampi an tong tiah theih a si.
Paletwa peng fimcawnnak phu hruainak in caan karlak awnmi mipi sianginn pawl cu Paletwa peng chung khuate 60 lengah July thla thok in awn a si cang i a hleikhun in cacawnnak thilrii pawl an har tuk tiah Paletwa peng fimcawnnak phu hruaitu nih a chim.
“Sianginn ah hman ding thilri pawl, cacawnnak caah a herhmi cauk thok in zeihmanh kan tuah piak kho hna lo. Atu hmanh hi ukpi (text book) pawl cu pahnih/thum fonh in kan zohter hna. Sianginn thuam hrim cu a um bak ti lo. Atu cu inn umnak thil sawhsawh in kan kaiter hna” tiah Khonumthung Burmese ah a chim.
Atutiang cu Primary le Middle School tiang lawng dirh khawh rih a si i siangcachim 160 nih siahngakchia 500 hrawng cachimh a si tiah theih a si.
Siahngakchia ca a chimmi pawl hi Paletwa peng chung mi (Voluntary) pawl an si i siangcachim training hi a sithiamnak in pek a si tiah theih a si.
Siangcachim caah retheih man 50,000ks cio pek ding in timhtuah a si ko nain tangka lei chanbaunak ruangah 10,000 lawng pek khawh an si tiah Paletwa peng fimcawnnak tlangtlatu phu rianngeitu nih a chim.
“Siangcachim pawl hi 50,000ks cio pek ding in kan i ruah ko nain a tlamtlin lo caah minung pakhat ah 10,000 lawng kan bawmh khawh rih hna” tiah Khonumthung Burmese ah a chim.
Cubantuk in Paletwa peng fimcawnnak tlangtlatu phu hruainak in Mizoram, Lawngtlai pengkomh chung ralzaam camp 10 ah awnmi sianginn pawl zongah bawmhnak le cacawnnak thilri pawl an herh rih tiah theih a si.
About The Author
