Phakant i SAC kuttang phu sakhaan KIA nih an khangh
![](https://i0.wp.com/thechinlandpost.info/wp-content/uploads/2022/08/KIA-army-1.jpg?fit=640%2C426&ssl=1)
The Chinland Post | 2022 August 12 – Kachin ram, Phakant peng, Shaduzuat pawng i SAC ralkap sakhaan pakhat le SAC kuttang phu sakhaan pakhat cu KIA nih August 11 zinglei ah an va kah hna tiah theih a si.
Cu sakhaan pahnih chung in SAC kuttang phu sakhaan cu KIA nih an khangh khawh tiah KIA Colonel Naw Bu nih RFA ah a chim.
Khanghpiak a simi sakhaan hi SAC ṭanhtu U Min Zin Thant hruaimi SAC leiṭang phu an si i hramhram in uknak lak a si hnuah Shaduzuat hmunhma tlaih khawhnak hnga aa zuami phu an si tiah theih a si.
KIA nih an khanghpiak mi hna sakhaan hi cuka hmunhma mipi pawl sin in ngunkhuai tampi an lak lengah an biahal dan hna a fah tuknak sakhaan a si.
Kahdohnak a chuah lioah Shaduzuat khua ah hram a bunhmi SAC ralkap 297 nih hriamngan in kah a bawmh hna.
Kahdohnak chungah KIA ralkap 1 a nunnak a liam i pakhat hliamhma a tuar. SAC kuttang phu a thimi zong an um tiah khuami hna nih RFA ah an chim.
A luancia July 18 zongah KIA battalion 14 hmunhma i KIA sakhaan pakhat cu SAC kuttang phu nih an kah hna i KIA ralkap 2 an thi tiah RFA nih a langhter.
Phakant peng Sezin khuate zongah SAC ralkap, Shanni ralkap le KIA, PDF phufonh karlak ah August 8-9 tiang kahdohnak a chuak i mipi 5,000 leng himnak hmun ah an zaam i inn 400 leng SAC ralkap nih a khangh tiah theih a si.