Ralkap Council Nih Kahdaih Hnatlaknak A Buar Ṭhan Tiah Unau Hawikom Phu 3 Nih An Thanh
The Chinland Post | 2024 January 25 — Shan ram chaklei, kahdaih hnatlaknak “Haikin hnatlaknak” cu ralkap council nih upat lo in an buar tiah unau hawikom phu 3 nih January 24 ah an thanh.
January 24 ah MNDAA nih tlaihnak Kokang hmunhma, Man Peng pengkomh chung ah ralkap nih phu 2 in an rak luh i kahdohnak an tuah caah MNDAA lei 1 a nunnak a liam tiah an ṭial.
Ralkap nih Lashio peng, Nam-ṭun khua ralkap sakhaan in TNLA le Theinni ramri hlei cu hriamngan in an kah tiah an langhter.
Atu bantuk thiltuah hi Haikin hnatlaknak ralkap lei nih a voihnihnak an buar a si i January 16 zong ah a voikhatnak an buar cang tiah an ṭial.
Haikin hnatlaknak a buar hi a karlak in a kan tawlrel piak tu Tuluk ram bawmhnak zei a rel lo a si tiah an țial fawn.
Cu kong he pehtlai in ralkap lei nih an thanh mi a um lo.
Ralkap Council le unau hawikom phu hna cu 2023 October 27 thawk in Shan ram chaklei ah kahdohnak aa thawk i 2024 January 11 ah Tuluk tlangtlaknak in kahdaih hnatlaknak min an thut.