Rihkhawdar SAC ralkap sakhaan a kapmi Chin hriamtlai phu pawl a zii ka zut hna lai tiah a thanh tu CDF-Hualngoram cu CNO, ZFU nih ralrin an pek
The Chinland Post | 2022 August 15 – Falam peng, Rihkhawdar khua, Haimual khuathar ah a ummi SAC ralkap sakhaan a kaptu Chin hriamtlai phu pawl cu raltuknak in a zi ka zut hna lai tiah cathanh a chuahtu CDF-Hualngoram cu Chin National Organization (CNO) le Zomi Federal Union (ZFU) nih ralrin an pek.
August 10 ah hawikom phu a simi ZFU/PDF-Zoland, Mountain Eagle Defense Force (MEDF), CDM-Siyin, CNDF phufonh hna nih Haimual khuathar pawngah a ummi SAC ralkap sakhaan cu an rak kah i SAC ralkap lei in Commander telh in 8 an rak thi.
Cu kong he pehtlai in CDF-Hualngoram nih fak piin sual a phawt i raltuknak in a zizut a si lai tiah a thanhmi cungah ZFU nih mipi hriamtlai phufonh nih kahdohnak tuahmi cungah atu bantuk in sualphawtnak tuah cu Dothlennak min aa bunh ve komi hriamtlai phu pakhat nih a tuahding a si lo tiah a langhter.
CDF-Hualngoram nih khualtlawng mipi pawl sin in tangka tampi a lak tiah ZFU nih a thanh i Tedim mipi uknak phu nawl hal hmasa loin atu bantuk thiltuahnak ti lo ding in ralrinnak a pek.
CNO/CNDF zong nih CDF-Hualngoram cathanh he pehtlai in cathanh a chuah ve i Rihkhawdar khuami hna harnak tong ding le hnahnawhnak pek ding in cheukhat hriamtlai hna nih an tuah kha hmuh khawh a si. CDF-Hualngoram zong hi mipi duhnak zeirel loin hramhram uknak bantuk he aa khatmi cathanh pawl a chuah caah phukhat le phukhat karlak ṭhencheunak a chuahtertu cathanh a si kha hmuh khawh a si tiah a langhter.
CNO/CNDF cu hramhram uknak a hrawkding MEDF, CDM-Siyin, PDF-Zoland telh in zeibantuk phu hmanh he lungrual tein kan ṭuanti lai i mipi pawl harnak le thinphannak thil a tuahtu zeibantuk phu hmanh doh an si lai tiah a thanh.
Cun, CNO/CNDF nih kan rak thanh cang bantuk in Falam peng chungah adang hriamtlai um lo ding le CNO/CNDF hnatlakpinak tel loin kahdohnak tuah, mipi pawl thinphanternak thiltuah pawl hrial cikcek ding in fak piin CNO/CNDF ralrinnak a thanh.
About The Author
