SAC Kuttang Myinchin Pyuthusit Pawl PDF Nih An Kulh Hna I Pakhat An Tlaih Khawh
The Chinland Post | 2023 August 25 — Sagaing ramṭhen, Shwebo peng, Myinchin khuate in SAC ralkap kuttang pyithusit pawl cu hmunhma an lak lio ah dothlennak phu pawl nih an kulh hna i pyithusit pakhat an tlaih khawh tiah Mahura Shwebotha PDF nih thawng an thanh.
Myinchin khua in pyithusit pawl cu Phattan tlang ah nifatin hmunhma an la tiah thawngpang an theih caah dothlennak phu pawl nih timhcia tein an hngah hna i phat-tan tlang an phak hlan ah dothlennak phu pawl nih an dum hna, kaphnih karlak kahdohnak a chuak i pyithusit pakhat a nung in an tlaih tiah theih a si.
An tlaih mi pyithusit pakhat cu MOD kuttang Shwebo pengkomh B04 le Myinchin PDF hna sin ah Captain Micawng phu nih an ap hna tiah theih a si.
Operation chung ah Mahura PDF, Captain Micawng phu, Shwebo PDF, Daung Mann, Daung Sitt Thae, Shwebo Federal Army, Shwebo Aa Mann, Bomaha, Snake Eyes, Shwebo Sunye, Zeya twe, Flying Dragon Force hna an i bawm tiah theih a si.
About The Author
