SAC nih CNF Headquarters bom thlak aa tim maw?
The Chinland Post | 2022 November 11 – Chin ramkulh chaklei, Thantlang peng, Myanmar-India ramri ah hram a bunh mi CNF Headquarters cu SAC nih bom thlak ding in ngiathlaitu vanlawng a thlah caah bom a thlak te kho men tiah an ruahdamh.
Hramhram in uknak lak a si hnu ah mipi nih a lam kip in an doh mi SAC cu ralram ah a sungh deuh thluahmah bantuk in vanlei kahdohnak pawl hna a tuah chin thluahmah caah atu bantuk in ralrin peknak hna zong a thang chin.
Kan hnulei te ah Chin Nuhrin Covo phu nih CNF Headquarters, Victoria Camp, cu SAC nih vanlei in bom thlak ding tiah an timhtuahnak tette hmanthlak cu an Twitter cahmai ah an langhter.
Cun Chin ramkulh kha vanlei in doh aa tim mi SAC cu Chin ramkulh he aa pehtlaihnak Kalaymyo ah kahdohnak vanlawng 2 a timhcia tiah Chin Nuhrin Covo phu nih an chim.
Cu kong he pehtlai in SAC leiṭang Telegram Channel pawl nih Victoria Camp hmanthlak pawl kha an tar kha hmuh khawh a si.
Cu bantuk in SAC nih a langhternak hmunhma pawl hi miphun ralkap pawl lawng si lo in mipi sawhsawh zong an umnak hmun a si tiah CNF biachimnak nawl a ngeitu Salai Htet Ni nih The Irrawaddy ah a chim.
“Headquarters hmun 14 kha an i tinh. Cuka hmun cu CNA lawng si lo in mipi an rianṭuannak hmunhma pawl zong aa tinh chih. A cunglei in bom an kan thlak a si ahcun kan si khawh tawk in kanmah le kanmah kan i runven lai. Mipi pawl him tein kan runven khawhnak le a thilo mi an um bak lo nak hnga a ṭha bik in kan i timhtuah” tiah a chim.
SAC nih vanlei in a ngiathlainak CNF Headquarters hi Thantlang in meng 50 aa hlatnak India-Myanmar ramri pawng ah a um mi a si.
Victoria Camp cu a luancia caan ah ngiathlainak vanlawng 1 a zuang i bom a thlak lai tiah thawngpang a leng ko nain a taktak ahcun CNF Brigade 3 hmunhma ah bom a thlak.
Vanlawng in bom a thlak hnawh ko hna nain CNA le Chin hriamtlai pawl an him tiah Salai Htet Ni nih a chim.
Cun November 9 zong ah SAC nih vanlawng in bom a thlaknak CNF Brigade 3 hmunhma chung ah SAC ralkap pawl an cawlcangh caah kahdohnak a rak chuak i SAC ralkap 3 an thi, mipi hriamtlai 1 aa hliam tiah CNF lei nih an chim.
Kahdohnak a chuah lio ah Hakha khuachung ah hram a bunh mi SAC LIB 266 nih hriamngan kah a bawmh hna bantuk in nifatin ngawt in hriamngan an kah, Helicopter in minung thazang, eidin, hriam hna a bawmh lengmang tiah theih a si.
CNF nih an tlaihnak Hakha, Thantlang peng hna ah SAC Infantry 266 leng ah Rakhine ram, An khua hrambunh Infantry 203 le 204 kuttang pawl zong an cawlcang tiah theih a si.
Cu bantuk in cawlcanghnak a um ko nain kahdohnak tuah le kahdohnak hna a zor chin thluahmah i pau a chuah cang caah SAC nih vanlei in kahdohnak hna a tuah chin kho men tiah an ruahdamh.
Asinain vanlei kahdohnak a chuah tikah CNF le mipi hriamtlai pawl nih lehrulh ṭhan khawhnak dirhmun an ngei lo tiah Salai Htet Ni nih a chim.
“Vanlei hi cu doh ṭhan khawhnak dirhmun kan ngei lo. Vanlawng kahnak hna kan thader tuk. Zeitin dah kan i runven khawh lai, zeitin dah mipi pawl le ralkap pawl himnak kan pek khawh hna lai ti mi lawng kha a ṭha bik in kan i timhtuah” tiah a fianh.
CNF/A hi NCA ah min a thu mi phu an si ko nain hramhram in uknak lak a si hnu ah mipi he dirṭi in SAC an doh chih.
Chin ramkulh hi lai meithal tlaih in SAC a hmasa bik a doh mi, mipi hriamtlai thazang a ṭhawnnak ram a si.
Kahdohnak chung ah a sung mi SAC ralkap pawl nih mipi an tlaih/thah hna, innlo tampi khangh i Thantlang khua zong khua ning piin a ciam dih deng.
Kahdohnak lawng si lo in hmunhma tlaih khawh nak le mipi uknak thazang an ṭhawnter chin i SAC kuttang rianṭuantu pawl zong chuah ding in an forh hna i an ṭhawnnak an fehter chin.
Cucaah SAC nih CNF Headquarters le mipi hriamtlai phu pawl an sakhaan cu vanlei in bom a thlak khawh mi dirhmun a si i Headquarters tiang a doh zong ah CNF/A nak in mipi pawl a hliam deuh lai tiah ramkhel lei thiamsang U Than Soe Naing nih a chim.
“CNF Headquarters hmunhma a um ko nain ṭha tein sak le dirh mi a si lo. Khuate pawl karlak ah an um i Headquarters ramri an khiah mi lawng a si. Cucaah CNF Headquarters bom a thlak a si ahcun mipi a thi mi le hliam a tuar mi tampi an um lai” tiah a ruahdamh.
SAC nih vanlei kahdohnak tampi a tuah i a doh mi hi dothlennak phu pawl hrawh dih duh le an i timhtuah mi thimnak a tlamtlin khawh nak hnga caah a si khawh chung in an i zuam mi a si tiah Salai Htet Ni nih a chim.
Atulio ah Chin ramkulh he aa pehtlai mi Sagaing ramṭhen chung ah SAC ralkap nih vawlei lei nak in vanlei hmang in a kah i Helicopter in hmunhma zohfelnak hna a tuah lengmang.
About The Author
