SAC Nih Hrithlai In Thahmi 88 Siangngakchia Hruaitu Ko Jimmy, Zayar Thaw le Adang 2 Thahnak Kum 1 A Tling
Kan hnu kum, 2022 July 23 ni ah Ralhrang SAC nih Zauk phung tanhtu minung 4 hrithlai in an rak thah hna. Cuchung ah, 88 Siangngakchia hruaitu hlun, Ko Jimmy Le NLD palai Ko Phyoe Zayar Thaw (ကိုဖြိုးဇေယျာသော်), U Hla Myo Aung (ဉီးလှမျိုးအောင်) le Aung Thura Zaw (အောင်သူရဇော်) an pali Hrithlai in thah an tonnak kum 1 tlin ni a si.
Democracy kong ah a cawlcangtu hna an thahnawn mi hna hi International phunglam an buar a si tiah thiamsang hna nihcun an soisel hna. NUG Human Rights Minister U Aung Myo Min zong nih “Thonginn chung thahnawn nak” a si tiah ca a rak tial.
Tutan ah, a hlei khun in Ko Jimmy kong a tawinak tein kan hun tial.
Ko Jimmy Tuanbia Tawi
Ko Jimmy (a min tak Ko Kyaw Min Yu) cu ralhrang uknak duhlo in dohthlennak a tuah hi a thih tiangah kum 30 leng dohtlennak a tuah peng mi paraltha pakhat a si.
1988 kum Yangon University siangngakchia a rak si. 1988 March 16 Yangon Inyaa lake ah ralhrang duhlonak langhternak lamzawh lio ah Ne Win (Ma Sa Lah) chan palek phukhat bu nih an rak velh hna caah Tadani buainak a rak um. Cu siangngakchia buainak in Ko Jimmy cu ramkhel dohthlennak lei ah a lungthin a hun um mi a si.
Thongtlak a tonnak
8.8.88 rampi buai lio cawlcanghnak ah Insein thonginn, Tayarwaddy thonginn, Taungyi thonginn hmun ah kum 16 (1988-1996 in) thong a rak tla.
2007 kum August thla, 2007 kum Saffron revolution (ရွှေဝါရောင်အရေးအခင်း) ah siangngakchia bu he datsi, Zinam man kainak duhlonak lamzawh kong ah thong kum 65 tla dingin degree an rak pek. Nain, President U Thein Sein cozah a kai hnu January 13, 2012 ah thong chung in a luat. Thong kum 5 a tla manh.
Catial hramthoknak
Thonginn ah a um lio ah Hanthawaddy U Win Htin sin ah Journalist catial thiamnak, U Myo Myint Nyein bawmhnak in English dictionary cauk pakhat cu thonginn chung a um lio ah a dihlak ah a rak by-heart khawh dih hnu ah calehthiamnak (Translator) catialtu a si tiah Myanmar Times zong nih a langhter.
Dohtlennak ah aa tel hnu in harnak phunphun a ton i a huam cem mi a catial capar, cauk ah a mah min put/langhter in cauk chuahnak nawl cu cozah nih a rak khap. Jimmy min in silo in Pone Thu Kah tiah Yadi makazin le A Lin Dane journal ah ca a rak tial ton. Democracy cozah a kai hnu in cauk, capar kip a tialmi ah Jimmy min langhter a hun si.
2005 kum ah Kawlca in a rak let mi Andrew Matther/Making friends cauk cu zuar kho cemmi cauk tha pakhat a si.
2012, September 6 Taungyi thong a um lio ah 2010 kum lio a rak tialmi အင်းလေးကန်ရှိမွန်းဝတ္ထု (လမင်းဆန္ဒာအင်းလေးကန်) timi lenhloi a chuah. Taungyi thong a um lio ah ပန်းပုလွင်ပြင် timi ramkhel kong a tialmi cu Japan ram ah cauk tampi in an rak nam/chuah kho. Ko Jimmy thonginn a um chungah Angels and Demons le Da Vinci Code lenhloi telh in lenhloi tampi kawlca in a rak leh. Thonginn a chuah hnu, kumkhat chung ah hmun 30-70 tiang Literature talk biachimnak a ngei.
2021 February thla hnu lei:
2021 SAC uknak a lak hnu ah Myanmar ram a hmasa bik tlaihkhih a tonmi ah Ko Jimmy aa tel rih lo. February 13 hnu in Min Ko Naing he Pohmah 505 (b) in tlaihding in “wanted list” an rak chuah.
Caan zeimawzat a rauh hnu ah, 2021 October 23 ni ah Yangon, North Dagon i inn pakhat ah Ko Jimmy tlaih a ton hi a si.
2022, January 21 ni ah Ko Jimmy, NLD palai Ko Phyoe Zayar Thaw (ကိုဖြိုးဇေယျာသော်), U Hla Myo Aung (ဉီးလှမျိုးအောင်) le Aung Thura Zaw (အောင်သူရဇော်) hna cu hrithlai in kan thah hna tiah SAC nih thawngthanhnak a tuah. Cu thawngthanhnak ah Ko Jimmy le a hawile mi 4 kut ah meithal le a puak kho mi hriamnam an tlaihnak, le NUG, CRPH he pehtlainak an tuah ruangah kan thah hna tiah SAC lei nih an chim.
Innchungkhar
Ko Jimmy cu amah bantukin ramkhel dohthlennak a tuah ve mi a nupi Ma Ni Lar Thein he fanu Ne Chi Min Yu an hrim.
About The Author
