SAC Ralhrang nih Chin Ram ah Khrihfa Biakinn 40 Leng A Khangh, Rampi ah Minung 5,000 leng an Thah Cang
The Chinland Post| 2022 July 12 — Ralhrang SAC phu nih nawlngaihnak hramhram an lak February 2021 hnu in, Chin ramkulh le Chin miphun umnak hmun lawng ah Khrihfa Biakinn an hrawhmi 40 leng a si cang tiah Chin Human Rights Organization (CHRO) sin in, kan theih.
Kan ram chungah ralhrang nih Khrifa Biakinn hrawh piak khawhnak hnga an khuakhannak ah a tel ve cuahmah mi minung an um ahcun zaapi theih in kan Khrihfa bu chungtel sinak in hnonchuah ngam ding a caan cu cang…
Chin ramkulh chung ah SAC ralhrang le amah leitang Chin miphun Khrihfa lila telh in, Biakinn 40 leng an khangh i Thantlang lawnglawng ah Biakinn 11 an hrawh, an khangh tiah CHRO nih June 11 ah a thanh.
Hi kong he pehtlai in, Biaknak zalonnak le Nuhrin covo kilhkamhnak ah riantuan mi pakhat nih, “Kan ram chungah ralhrang nih Khrifa Biakinn hrawh piak khawhnak hnga an khuakhannak ah a tel ve cuahmah mi minung an um ahcun zaapi theih in kan Khrihfa bu chungtel sinak in hnonchuah ngam ding a caan cu cang…” tiah a pumpak cahmai ah a duhnak langhternak a chim.
Chin miphun umnak lawng silo in, Tlangcung miphun Karenni (Kayah) ramkulh zong ah a tlawm bik Khirhfa Biakinn 10 tluk an hrawh cang tiah theih a si.
Ralhrang nih Biakinn hrawng le inn khangh lawng si lo in, sualnak ngei lo mi tampi zong a thah cang tiah thawngzamhnak kip le felfai tein a khawmtu phu nih June thla chung ah thanhnak an tuah.
Hi kong ah, Ralhrang SAC nih Rampi huap in, Biakinn an hrawhmi lawng silo in Mi nunnak an hrem ruang ah siseh, kahdohnak ruang ah siseh, an lakmi hi a tlawm bik 5,650 tluk a si cang tiah Institute for Strategy and Policy (ISP Myanmar) nih June thla ah a thanh.
Hihi Ralkap SAC phu nih nawlngaihnak an lak thawkka in, kadohnak a chuah hnu in siseh, cun Ralhrang lei tang, Pyu Saw Htee, Thwe-thoh tbk. phu nih an thahmi hna le kahdohnak kiangkap le bom ruang ah a thimi pawl telh an si.
Ramkhel ruang ah thongtlami bawmchantu phu, Assistance Association for Political Prisoners (AAPP) bel nih cun, Ralkap le an lei tang bak nih an sualnak ngei lo an thahmi hna hi 2000 an si cang tiah June 22 ah a thanh.
About The Author
