June 20, 2024

SAC Ralkap Nih Byaing-phu khuami 50 Leng A Thah Hna

0

The Chinland Post | 2024 June 3 — Rakhine ram, Sittwe khua, Byaing-phu khuate mipi 50 leng cu SAC ralkap nih hri in a hren hna, nitlang ah a pho hna, rawl pek lo in a hrem hna hnu ah an thah hna caah AA nih terul kan cham lai tiah an thanh.

SAC ralkap le Arakan Liberation Pary (ALP) chungtel ralkap pawl nih Rakhine ram, Sittwe khua, Byaing-phu khuami pawl cu an tlaih hna i an hnulei kutsih in hri an hren hna, nitlang ah an pho hna, rawl an pe hna lo, an hrem hna hnu ah mipi 50 leng an thah hna caah The United League of Arakan (ULA/AA) nih kan cohlang kho hrimhrim lo tiah June 2 ah cathanh a chuah.

SAC ralkap nih hram an bunhnak Sittwe khua ROC ralkap pawl, Pakokku hrambunh Brigade 101 ralkap pawl, adang ralkap battalion in ralkap cheukhat pawl, ALP hriamtlai cheukhat tiah thazang 170 leng nih May 29 ah Sittwe khua, Byaing-phu khuate cu an kulh i khuachung um hngakchia, upa, mino, pa, nu ahohmanh tang lo in khua ning in an rak tlaih hna.

Cu hnu ah Byaing khuami pawl cu an hnulei kutsih ter in hri in an hren hna, nitlang ah an pho hna, ti le rawl an pe hna lo, an hrem hna, hriamnam bochan in an thah hna, an tlaih mi hna chung in mipi 50 leng an thah hna, nu pawl kha an tlaihhram hna hnu ah an ruak an hloh hna tiah AA nih cun a thanh.

Cun minung a thong in an tlaih hna, mipi ngeih mi sui, ngun, phone, cycle pawl hramhram in an chuh hna hna caah SAC nih sualnak ngan taktak, Crime Against Humanity, a buar caah AA nih fakpi in kan doh, atu bantuk thil hmailei ah a can ṭhan ti nakhnga lo fakpi in ralrinnak kan in pek hna tiah an thanh.

Sittwe khua, Byaing-phu khua ah sualnak ngei lo mipi pawl that ding in nawl a petu, nawlpek ning in a that tu Brigade, Battalion le sual buarnak ah aa tel mi vialte cu teirul cham nan si lai tiah AA nih a thanh.

About The Author

Na ruahning rak langhter ve.. (Leave a comment)