SAC Vanlei Kahdohnak Ruang Ah Thla 4 Chung Ah Minung 72 An Thi
The Chinland Post | 2023 October 24 — SAC ralkap vanlei kahdohnak ruang ah thla 4 chung ah mipi 72 an thi tiah Nyan Lin Thit Analytica phu nih thawng an thanh.
Thla 4 chung ah SAC ralkap nih vanlei kahdohnak voi 272 a tuah ruang ah mipi 72 an thi i 163 an i hliam, biaknak lei inn 33, sianginn 17, siikhan 4 a rawk tiah theih a si.
Vanlei kahdohnak hi Karen ram ah voi 71, Sagaing ah voi 69, Chin ah voi 29, Karen ah voi 23, Kachin ah voi 22, Shan ram thlanglei ah voi 14, Shan ram chaklei ah voi 12, Bago ramṭhen ah voi 11, Magway ramṭhen ah voi 10, Mon ram ah voi 6, Taninthary ramṭhen ah voi 2, Mandalay ramṭhen ah voi 2 le Naypyitaw ah voi 1 a tuah.
2021 February in 2023 August tiang hramhram in uknak lak caan ni 942 chung ah vanlei kahdohnak hi ni 462 a tuah, kahdohnak hi voi 902 a tuah i mipi 687 an nunnak a liam, mipi 458 an i hliam. Cun SAC ralkap nih kumkhat hnu kumkhat vanlawng kahdohnak a tuah hi a karh chin.
2021 February in December tiang ah SAC ralkap nih vanlei kahdohnak voi 85 a tuah i mipi 63 an thi, 42 an i hliam. Biaknak lei inn 8, sianginn 7 le sizing/sikhaan 4 a rawk tiah theih a si.
2022 kumkhat chung ah SAC ralkap nih vanlei kahdohnak voi 339 a tuah i mipi 260 an thi, 85 an i hliam. Biaknak lei inn 20, sianginn 14 le sizung/siikhaan 7 a rawk.
2023 January in August thladongh tiang ni 245 chung ah SAC ralkap nih vanlei kahdohnak voi 478 a tuah i mipi 364 an thi, 331 an i hliam. Biaknak lei inn 58, sianginn 33, sizung/siikhaan 15 a rawk tiah theih a si.
Hmanthlak – Monelai ralzaam camp bomthlak ruang ah a thi mi (2023 October 9)
About The Author
