Shan Ram Chaklei Ah MNDAA Nih Ralkap 128 Byu-ha le Adang Sakhaan 2 An Lak Chap
The Chinland Post | 2023 November 14 — Shan ram chaklei, Kokang hmunhma ah a um mi ralkap 128 byu-ha le Shauk-kai khua lamṭhen gate sakhaan le Pa-sin-kyaw khua um ralkap sakhaan hna cu an kah hna i ralkap sakhaan a zapi 141 an lak khawh cang tiah MNDAA nih thawng a thanh.
November 13 zinglei sml 3:30am hrawng ah Shi-shan hmunhma, Shauk-kai khua lamṭhen ah a um mi ralkap gate pakhat cu MNDAA nih hriamngan in an kah i kekal ralkap pawl nih an kah hna caah cuka hmun um ralkap zapi an fim khawh hna i hriam tampi an lak khawh tiah theih a si.
November 9 ah Chinshwehaw in chaklei ah a kal i Kokang pengkomh, Ton-shan hmunhma ah a um mi ralkap sakhaan pawl cu MNDAA nih pakhat hnu pakhat an lak thluahmah hnu ah Ton-shan hmunhma ah ralkap uknak zung a umnak hmun lei ah kahdohnak an tuah i ralkap byu-ha umnak, Hehauk tlang sakhaan le Min-shwe-chan ni tlaklei ah a um mi tlang sakhaan cu ni 4 chung an kah hnu November 12 zaanlei sml 3:50pm ah ralkap 128 cu thazang tampi in zaanlei sml 4:20pm ah an lut kho i zaanlei sml 4:50pm ah an lak khawh.
Cubantuk in zaanlei sml 5:17pm ah Kokang peng, Hung-Shin hmunhma, Chungkan khua sakhaan cu MNDAA le dothlennak phu pawl nih an lak khawh.
November 12 chun sml 1:00pm hrawng ah Laicung hmunhma ah a um mi ralkap sakhaan cu MNDAA le Monekoe, Kutkai hmunhma dothlennak phu pawl nih an lak, cun Lashio ah a um mi ralkap 507 battalion cu MNDAA nih hriamngan in voi 11 an kah i meng 12 tung ah um ralkap sakhaan zong voikhat an kah.
About The Author
