Sianginn cawngtu ralkap namte in a sawktu siahngakchia biahalnak ah a thi
The Chinland Post | 2022 August 15 – Pyi khua ah sianginn a cawngtu ralkap namte in a sawktu tang 7 siahngakchia cu biahalnak ah a thi tiah a naihniammi nih DVB ah an chim.
August 3 ah Pyi khua B.E.H.S ṭhen ah sianginn a cawng liomi ralkap cu tang 7 siahngakchia Mg Aa Gyit nih namte in a sawh i sawhnak a can dih tlawmpal ah Aa Gyit a nu, a upa le a hawile telh in minung 9 an tlaih hna.
Khuami hna nih “Atu cu an thlah dih cang hna. A hawi pakhat lawng an hren cang. Biahalnak ah a ummi hngakchia cu atutiang a nulepa he tonnak nawl an pe rih hna lo. Aa Gyit zong August 6 ah bia an hal i August 7 zinglei ah an thah. Atu hren a si rihmi hngakchia hi Aa Gyit an thah a theih caah an thlah rih lo. Amah zong kha Aa Gyit hi meithal hma in a thi tiah an chimter. Atu bantuk in ralkap thah ding ah sianginn a rak kai mi a si tiah an phuanter. Cucaah atutiang an thlah rih lonak hi a si tiah SAC chungin kan theih” tiah DVB ah a chim.
An thlah cangmi Aa Gyit a hawile 5 zong sual an phawt hna i biakamnak he an thlahmi hna a si i a nulepa zong min an thutter hna tiah a chim.
Asinain an thlahmi hna hi ṭihnak in an khat i zeibantuk bia hmanh hal khawh an si lo tiah a chimchap.
Sianginn zong an awn ṭhan i sianguk zong himnak caah meithal an pek bantuk in kah ningcang zong No.75 ralkap chungah an chimh i a kalnak kip ah an putter tiah khuami pakhat a chim.
“Aa Gyit a pa hi a luancia thla 6 hrawngah a thi. Atu hi a nu, a ule he an um. Hngakchia hi mi daite a si. A nu zong a dawt tuk. Sianginn a hngakmi ralkap pawl nih a nu min put in an pamh lengmang caah namte in a sawhnak hi a si” tiah khuami pakhat nih DVB ah a chim.
Hma a ingmi ralkap cu ralkap sizung ah an thlop tiah theih a si.
About The Author
