June 21, 2024

Taungzalat Times Journal Cu Pehzulh In Kan Chuah Ko Lai Tiah Chin Ramkulh Cozah Nih An Chim

0

TCP-Online| 2018 March 2| Chin Media Network (CMN) nih chuah lo dingin nawlnak a tuahmi Taungzalat Times Journal cu Chin ramkulh cozah nih pehzulh in kan chuah chih kho lai tiah an chim.

“Mizapi nih an theih awk a simi cu dik fel tein an theih ding a si. Kan nih cun Chin ram mizapi aiawh in cozah rian a tuanmi kan si. Cozah nih tangkaa kan hmanmi/hmannak vialte zong mipi nih an theih a hau, dik fel tein. Hiti mizapi nih an theih khawh nakding hin atu Chin Media vial lawng nih hin a zaat lo caah cozah nih a hrante in Taungzalat Times Journal kan chuahnak hi a si” tiah Chin ramkulh cozah aiawh in chimrel khawhnak ngeitu Minister Salai Isaac Khen nih The Voice thawngzamh ca ah a chim.

Kawlram chung ramkulh le ramthen cozah ah Chin ramkulh lawng hi a hran tein Journal a chuahmi an si. A dang ramkulh le ramthen cozah hna nih cun cozah thawngzamhca simi Kyimong le The Mirror hna ah an riantuannak an tlangzamh tawn. Nain, Chin ramkulh nih cun an mah te a hran in chuah an duhmi hi Kawlram zapi hmaiah ningzak ngaimi thil a si tiah CMN in riantuantu pakhat nih a chim.

CMN nih hin Taungzalat Times Journal a voi khatnak chuah hram an thok hin duhlonak le cozah bu pakhat nih mah bantuk tuah a herhlonak kong ca thanhchuahnak an rak tuah. Nain, Chin ramkulh cozah nih cun pehzulh in chuah an timh venak kong an chim ve than.

Taungzalat Times Journal cu February thla hramthok khan a voi khatnak bik an rak chuah cang in thla khat ah voi khat chuah peng dingin timhlamhnak an ngeih ti kan theih. +++

About The Author

Na ruahning rak langhter ve.. (Leave a comment)