Tedim Khua Cu Inn 30 Leng A Ciam Cang
The Chinland Post | 2024 May 28 — Chin ramkulh chaklei, Tedim khua cu SAC ralkap nih May 27 zaanlei thawk in an khangh caah mipi inn 30 leng a ciam cang tiah theih a si.
Tedim khua Myoma sang, Suimilam tung pawng inn pawl cu SAC ralkap nih nizaan zaanlei sml 4:00pm hrawng ah voikhat, zaanlei sml 6:00pm hrawng ah voikhat tiah voi 2 an khangh hi a si i mei a that tu um lo in innkhat hnu innkhat aa peh tiah theih a si.
“Nizaan zaanlei ah SAC ralkap nih an khangh chap caah kan inn zong aa tel ve, kan inn pawng inn vialte a ciam dih, zeihmanh aa pehtlai lo mi mipi inn an kan khangh piak, mipi nih zeihmanh zong kan ti hna lo, an khangh duh mi inn poh an khangh, nizaan ruah a sur tuk caah mei a thi dih, asinain inn 30-40 tiang a kang” tiah Myoma sang ah a um i an inn a kang ve mi khuami pakhat nih Khonumthung Burmese ah a chim.
Inn a kangh cuahmah lio muicawl pawl cu Social cung ah hmuh khawh a si i vanṭhat ah ruah a sur caah zaanṭim ah amah tein mei a thih hi a si tiah theih a si.
Inn kangh ruang ah Myoma sang um GAD zung telh in dothnih inn, thlor thing inn tampi a kang tiah theih a si.
Tedim khua kahdohnak hi Chin Brotherhood nih an tuah mi a si i May 26 zaan thawk in Tedim khuachung um SAC ralkap sakhaan pawl cu Chin dothlennak phu nih an kah hi a si.
Atutiang ah SAC ralkap Microwave sakhaan le Na-tah-lah sakhaan hna cu dothlennak phu pawl nih an lak khawh cang i SAC chungtel 9 zong a nung in an tlaih hna tiah theih a si.
Tedim khua kahdohnak ruang ah khuami zapi ngawt cu Kalaymyo le a pawngkam khua hna ah an zaam i atu hi kahdohnak a daih lio a si tiah theih a si.
About The Author
