Thantlang Meihri Tuahtu Company Nih Meizung Rikhiah Ningtein Nihlawh An Lak Ve Lai
Salai Elvis| 2018 July 15| Thantlang khuachung maha-dat-line meitung ah hri thar thlen le inn chung, inn leng meihri tuah ter cio a si i meizung rikhiah ning tein Company riantuan tu minung hna zong nih nihlawh an lak ve lai tiah theih a si.
“Mei hri tuahnak kongah kanmah Laimi in Company pa 4 an um. Cozah nih tha tein theih pimi le rianpek mi an si. Cucaah rian an tuan tikah meizung he i lo in nihlawh an lak ve lai i meizung nih rikhiah mi lengin laknak nawl an ngei lo” tiah Thantlang meizung lutlai Pu Maung Hlun nih a chim.
Hi Company pali hna cu Chin ramkulh dihlak ah mei tuahnak nawl License a ngeimi an si. Cunglei nih rikhiah piak mi chungah a biapi deuh mi hna cu meihri zam man (meter pakhat 330), mei hmih nak (kha-loh pakhat 1500), Saw-kat tuahman 1500, miti le michawng pakhat tuah man 1000 veve, mi-sut tuahman 3500, meter box bunhpiak man 3500, Circuit Breaker bunh man 4000, meter luhnak service wire tuahman 16400 le a dangdang zong aa tel rih. Hi lak ning cu mei zung le Company aa ruang tein an lak ding a si i Chin ramkulh dihlak aa khat dih tiah theih a si.
“Minung pakhat nih nikhat ah cuzat ka ni hlawh a si tisi lo in, inn khat ah miti, mi-chawng le plug tibantuk a tuah zat in lak ding a si. Micheu cu nan ni hlawh a faktuk an kan ti tawn. Si nain cunglei nih laknak nawl an kan pekmi ning tein la hna u si law hi nak tamdeuh in laknak nawl kan ngei. Aruang cu ka nau le zong ka chimh tawn hna, vuanthan pakhat kan si caah kan tuan awk a si, tamtuk zong la hna hlah u, zawnruahnak thinlung ngei u ka ti tawn hna” tiah Pu Maung Hlun nih TCP ah a chim.
Thantlang khuachung meizung riantuan tu hna nih mei tung le meter box karlak hri zam man lawng ah, atawi sau rikhiah lo in inn khat 15000 cio an lak hna tiah theih a si. Atu lio Thantlang khuachung nih maha-dat line 1100 W hman a si i, Hakha-Thantlang karlak ah chiah mi seh pakhat a tlam tlin rih lo caah Kalaymyo in pek mi ma-hadat-line hman chung a si tiah kan theih.+++
About The Author
