Thimnak Ca Lawng Hlah, Milurel in PDF/CDF Cazin An Khawmh
The Chinland Post| 2023 January 19 — Ralhrang phu State Administration Council (SAC) nih January 9-31 chung ah Ramkomh Kawlram chung ah milurel cazin khomh ding in timhlamhnak an ngei cuahmahmi i Chin ramkulh cheukhat, Hakha telh in an kholh cuahmah cang tiah theih a si.
Hi kong ah, Ralhrang phu Ralkap SAC nih a ra lai mi August thla ah a tuah lai tiah ruahdamhmi Thimnak (Election) caah Milurel an khomhmi a si tiah ruahdamh cio a si. Asinain, a taktak ahcun anmah Ralhrang a dotu, a ralkahtu minung hi zeizahdah an si tiah theih a duh caah a si. Inn chungkhar cazin an lak tik ah, a um lomi minung le chungkhar kong fiangte in theih khawh a si tiah an chim.
Khit Thit Media nih a phorzar mi, December 2022 ah Ralhrang phu an tuahmi meeting biakhiahnak zoh tik ah, Ralhrang SAC Home Minister Soe Htut nih zeidah an i timhmi a si timi fiang tein a chim. Cucu, tutan milurelnak le chungkhar cazin an lakmi hi a taktak ahcun Ralkap a dotu, a ralkahtu PDF, LDF, CDF tbk. pawl cazin ngah an duh caah a si timi a fiang tiah ngaithlaitu nih an tuaktaan.Cu lawng silo in, thawng le thilsining (intelligence) khawmhnak ah an hman mi a sinak a langhter chih fawn.
December 2022 ah Ralhrang nih anti-terrorisim meeting an tuahnak ah fak ngai in an thin a phannak zong a lang i, cucu zeitindah mino phu le ralhrang (SAC) a dokalhtu pawl hi an i cawm le an dir khawh timi a si zong a langhter fawn.
Atulio Ralhrang phu nih milurelnak le chungkhar cazin laknak an tuahnak a ruang hi, a dotu phu nih i fiang hna sehlaw cu atu bantuk cazin a lami hna le ralhrang caah riantuanmi hna nih fak ngai in an tuar hnga. Atu zong ah, mipi ralkap phu lei in tlerhkhonhnak, duhlonak le Ralhrang nih tuahmi thimnak ah tel lo ding in thanhnak tuahmi a um pah len cang tiah Irrawaddy nih a thanh.
Ralhrang nih milurel cazin a lakmi hi thimnak ca lawng a si lo, anmah a dohkalhtu hna sining fiang deuh in theih a duh caah a si. Cucaah, kahnak le tlerhkhonhnak hi a karh chin ko lai, a karh in a tam chin awk zong a si. Atu ah, thawngzamhnak zoh tik ah Natmauk, Magway ah siseh, Yangon ah siseh, Mon ah siseh, Taninthari ah siseh, kanmah Chin ramkulh Hakha ah siseh a hung um pah thluahmah.
Atulio ralhrang nih a tuah cuahmahmi ah zapi (mipi) nih teltumpi lo ding in le an thimnak (Election) tuah dingmi hrimhrim ah bawmh le tel lo ding in, NUG nih a thanh. Cun, PDF/LDF/CDF tbk. phu pawl nih mipi (civilian) kha hmaithlak (target) lo ding in NUG nih cun a thanh chap. #
About The Author
