Ti Tahnak Ri Leng Ti A Kaimi Kawlram Tikham 18 Lakah Laiva Dam Aa Tel Ve
Salai Elvis| 2018 June 12| Zarhkhat deng tluk ruah cat lo in a sur caah Kawlram chung Ti khammi (Dam) ti tahnak ri leng a lawnh mi hmun 18 ah a cang. Hi chung ah atu lio Thantlang khua nih hman lio mi Laiva Dam zong aa tel ve tiah theih a si.
Ti a tam tuk caah ti khammi (Dam) rikhiahmi leng a lawnh sual tikah ti phetnak (zi-pu-hluai) in a liam mi an si. Laiva Dam zong ti tahnak ri khiahmi leng a lawnh i pe 1.20 tluk ti a kai tiah see-miang zunglei nih thawngthanhnak an tuah.
Hi kong he pehtlai in “June 12 tiang ah Laiva Dam hi pe 1.1 lawng ti a kai caah a pawngkam khua le minung hna caah tih ding le thinphan ding a um lo. Pe 3/4 tiang ti liamnak tuah a si, a tu a liammi cu pe 1.1 hrawng lawng a si ko caah pe 4 tiang hmanh kai seh law thinphan awk a um lo. A tu Laiva Dam ah hi tiang lawng ti umter ding timi ri a lawnh ko nain, ti a kai sual tikah tiphetnak (zi-pu-hluai) a liammi in tah a si caah pe 1.1 ti a kai kan tinak cu a si. Hihi cu ti a tam paoh ah a cang theumi a si ko” tiah ramkulh see-miang lutlai AE U Myint Gyi nih TCP ah a chim.
Cu bantukin Kalay peng Ya-za-cu Dam zong pe 3.10 tiang ti a kai ve. Hmun 18 ti a kaimi Dam chungah hmun hnih lawng ti a kai ning a tam bik tiah theih a si. +++
About The Author
