Tlaihkhih mi pawl vialte thlah piak ding in India cozah sin ah zatlang phu 100 deng nih an hal
The Chinland Post | 2023 March 3 — India, Manipur peng, Inphal thong ah hren mi Chin ralzaam minung pakhat a thihnak kong ah fiang tein, thil sinning dik tein tuahpiak ding le hren a si mi vialte thlahpiak ding telh in thil phun 4 cu zatlang phu 100 deng nih peng cozah le Central cozah sin ah an hal.
Cu hal mi thil phun 4 chung ah tlaih a tong mi vialte thlahpiak ding le tlaihkhihnak tuah ti lo ding ti mi hi cohlang hna seh law ti kan duh tiah India for Myanmar a dirhtu Salai Dokhar nih RFA ah a chim.
“Democracy ram a si mi pakhat nih amah sin ah bawmhnak a hal mi minung tlaih tibantuk le thihnak tiang phak ter hi cu Democracy ram pakhat dirhmun in ṭuanvo nganpi he a tawlrel lai tiah kan zumh. A thi mi minung pakhat ca ruat chih in thlennak pakhat khat cu a tuah lai tiah kan i ruahchan. Kan hal mi thil phun 4 chung ah tlaihkhih mi vialte thlahpiak ding le tlaihkhihnak tuah ti lo ding timi te hi cu kan cohlan piak hna sehlaw kan duh” tiah a chim.
Imphal thong ah hren a si mi Kuki miphun Ko Lam Khu Chun (kum 32) cu February 25 ah ruah lo pi in a thi.
Democracy cawlcanghnak thapek ding, Manipur ah a thi mi ca ah a dik mi thil tuahpiak ding, tlaihkhih mi vialte thlahpiak ding, tlaihkhihnak tuah ti lo ding, Myanmar ram dirhmun ruang ah India ramchung ah a zaam mi hna dornak nawl pek ding ti mi thil 4 kha March 2 ah an hal.
Myanmar ram in a rak zaam mi hna kha Manipur cozah nih chikhat aa dor mi, ralzaam tiah ruat lo in phunglut lo tiah a ti lengmang hna i Myanmar ralzaam hna bawmhnak pek ngam lo ding in Manipur cozah nih a mipi kha a tlerh hna tiah Salai Dokhar nih a chim.
SAC nih hramhram in uknak a lak hnu ah India ram ah aa dor mi Myanmar ralzaam 60,000 leng an um i Manipur peng chung ah tlaihkhih a tong mi 170 leng an um tiah Data for Myanmar cazin ah hmuh khawh a si.
About The Author
