Tuzan Thlapalai Rak Zohte; 1866 Kum Lio Bantuk In Khuaruahhar Thlapa A Lang Than Lai
City Hunter| 2018 January 31| 2018 January 31 zan cu thlapalai (fullmoon_ lah-pih) zan a si. Hi zan ah voidang kel bang a chuakmi thlapalai siloin khuaruahhar in thlapa a laimi (full moon) hmuh khawh a si lai.
Singapore science lei thiamsang zung nih hi zan ah a chuakmi thlapa hi voidang kelnak in a ngan deuhmi supermoon, thlapa dawpdawlh (lunar eclipse) le thlapa dum (blue moon) timi phunthum hi hmakhatte ah hmuh khawh asi lai. Cucu, ‘Super blue total lunar eclipse’ tiah auh a si tiah an phuan.
Tuzan a chuak dingmi thlapa hi a luancia kum 152 lio a simi 1866 kum ah voikhat a rak chuak/cang bal. Cu hnu cun tuzan hi avoi 2nak a chuah a si than lai. 2018 January 31 hi thlapa le vawlei aa naih bik nicaan a si ruang ah thlapa hi voidang nak ngan deuh in hmuh khawh a si lai caah “Supermoon” tiah an auh.
Cu pin ah hi ni ah tukum chung a hmasa bik thlapa dopdolh (lunar eclipse) zong a chuak lai tiah theih a si. January 31 hi thlakhat chung i a voihnihnak thlapalai (lah-pih) a si ruang ah “Blue Moon” timi zong a chuak lai tiah science lei thiamsang nih an ti. 2018 January 1 ahkhan thlapalai (fullmoon) voikhat a si cang, atu hi thlakhat chung ah avoi hnihnak thlapalai a si than lai.
A tlangpi in thlakhat chung ah thlapalai (fullmoon) cu voikhat lawng a si tawn nain atu January thla ahcun voihnih a chuak lai. “Blue Moon” tiah an auhnak cu a cang bal theng lomi asiloah kumsau tuk a rauh hnu i a cangmi thil a si ruang a si. Cun thlapa muisam hi vandum mui (blue color) taktak a si lai lo tiah Singapore Science lei thiamsang zung nihcun an ti.
Thlapa dawpdawlh ruangah January 31 zan thlapa muisam hi asen asiloah darsen (copper) muisam in nan hmuh lai. January 31 zan ah kan hmuh dingmi thlapa muisam le sining cu lungtho ngai in hngah i ngiatthlai le zohfel cio a hau tiah Science lei thiamsang zung nihcun an ti.
Ref: Duwun
About The Author
