May 21, 2024

US Immigration Zung Nih Ca Pek In A Auh Tawn Hna Caah US Um Kawlram Mi An Thin Phang Cang

0

TCP-Online| 2018 March 5| United States Citizenship and Immigration Services (USCIS) nih US phan cia Kawlram mi hna cu ‘na konglam cithlat kan in duh caah zung ah van ra’ tiah ca pek in an auh tawn hna caah US phan Kawlram mi minung tampi cu thin phang in an um ti kan theih.

Hiti US cozah nih a auhmi chung in Iowa State lawng hmanh ah minung 50 hrawng an si cang. Auh a tongmi Kawlram mi hna cu kan si khawh tawk in kan bawmh tawn hna tiah Iowa State in Karen Association ah chungtuan Maung Win nih a chim.

“An thin a phan ko hna. A sullam cu US Immigration bak in ca pek in an auh tik hna ah mu. Hiti an inn ah ca a phak tikah cheukhat pawl cu Mirang holh an thiam lo tikah bawmh an rak kan hal. Ca an hmuhmi hi a deu maw si a tak dah ti kan zohpiak hna hnuah Immigration zung ah kan kalpi hna. Mah le bu (Association) cio in kan i bawm hna.”

 

Iowa State khuapi Des Moines hrambunh EMBARC timi Kawlram mi pawl a lamkip in a bawmtu bu nih kan hnung cacawn ni ruk ni khan ca thanhchuah an rak tuah. Cu an thah chuahmi ah cun, hiti US Immigration nih ca pek in a auhmi hna cu anmah tein dengteo in kal colh lo ding le an ca donmi cu mah le Fellowship hruaitu hna hmuhhmasa ter hnu lawng ah, cu nih cun a herh ning in Sihni zong hlan in kalpi ding in cathanh cu an chuah.

Atu bantuk in US cozah lei nih a auh cangmi hna cithlatnak a tuah tawk hin buainak/hnon tibantuk cu a um rih lo. Aung a tongmi hna cu a bikin Malaysia le Thailand in US ram a phan deuhmi lawngte an si rih hna.

Dr. Rodinga nih a chimning cun “Min aa thuatmi le chuahni/kum tibantuk aa thuatmi an tam tuk tikah US cozah nih Malaysia hrambunh UNHCR zong Warnining a pek cang hna. Hiti a pek tik hna ah Kawlram ralzaam minung thong 4 leng US phan ding zong an phak khawh rih lonak a si” tiah a chim.

Malay UNHCR nih 2013 kum khan ralzaam min cazin lak a phih cang hna i 2013 hlan paoh i min cazin a rak pemi hna cu atu ah an buai cuahmah lio zong a si i US ram luh zong US cozah nih an kham rih lio hna a si ti thawng kan theih.

Ref:VOA

About The Author

Na ruahning rak langhter ve.. (Leave a comment)

%d bloggers like this: