Vanlawng kahnak hriam a um cang tiah NUG nih a chim

The Chinland Post | 2022 October 10 – SAC i vanlawng pawl a thla khomi hriam pawl kan ngah cang tiah NUG Information and Technology Minister U Htin Lin Aung nih a chim.

October 7 ah online in tuah mi kumkhat chung mipi dothlennak dirhmun ruahṭhannak le rian kong report peknak Press Conference ah a chim.

U Htin Lin Aung nih “Vanlawng kahnak hriam pawl kan ngei cang. Cu hriam pawl cu hmunhma ṭha te ah kan chiah hna. Khoika dah a si cu kan chim rih lai lo. Vanlawng pawl cuka hmunhma an kal ahcun kan thlak ko lai” tiah a chim.

NUG nih a ngeihmi vanlawng kahnak hriam hi zeibantuk dah a si cu a chim lo.

NUG nih SAC vanlei kahdohnak pawl a kham khawhnak hnga vanlei khamnak phung ṭha tein kan ngeih khawhnak hnga aa zuam lio a si tiah a chim fawn.

Cun SAC vanlawng le Helicopter a mawngtu pawl zong kha dantat an si lai i SAC nawlchuahnak ruangah a si tiah hrial a ngah lai lo tiah U Htin Lin Aung nih ralrinnak a pek hna.

Na ruahning rak langhter ve.. (Leave a comment)

%d bloggers like this: