Vice President Pu Henry Van Thio, Laldinthari le Pu Zo Bawi Cu The Chinland Post Nih 2017 Chung Thawngpang Sertubik Ah Kan Thim Hna

The Chinland Post nih Chinmi chung in thawngpang a ser khotu bik le tuanbia thar a tialmi pawl thimnak kan tuah lengmang. Kumtin a thim tawnmi “News maker of the year” cu kan thim than cang i 2017 kum chung i Chin miphun ah thawngpang a sertu bik tiah kan ruahmi minung pa thuam kan rak thim. Cu hna cu; ramkomh Vice President Henry Van Thio, Laldinthari le Pu Zo Bawi hna an si. Kan thimning le konglam cu a tanglei bangin kan van langhter. 

Pu Henry Van Thio

Vice President Pu Henry Van Thio cu Thantlang peng Amyotha Hluttaw in 2015 thimnak ah MP a tlingmi a si. NLD nih President caah Amyotha Hluttaw ah 2016 March ah an chuahpi i U Htin Kyaw le U Myint Shwe nih thimfung tamdeuh in an tei caah Vice President (2) a ngah. Chin ramkulh tuanbia ah a pakhatnak Kawlram pumpi in riansang bik a tuan hmasami hruaitu ah a hun i chuah.

Vice President (2) lawng a si ko nain cozah aiawh in hruaitu rian an pekmi hi Kawlram ramkhel le thanchonak caah biapi taktak mi lawngte an si. August thla 17 tiang ah Kawlram huap in cozah riantuannak committee chung ah Committee 12 cu amah nih haotu (Chairman) sinak in a hruai hna. Cu a tlaihmi biapi chung ah Myanmar Special Economic Zone Central Committee (ျမန္မာအထူးစီးပြားေရး ဇုန္ဆုိင္ရာဗဟုိအဖြဲ႕), National Eco-tourism and Development Central Committee (အမ်ိဳးသား ခရီးသြား လုပ္ငန္း ဖြံ႕ၿဖိဳး တိုးတက္ေရး ဗဟိုေကာ္မတီ) ,Vawlei hmunhma le hmuhma chuh a tongmi zohthannak Committee (လယ္ယာေျမႏွင့့္ အျခားေျမမ်ားသိမ္းဆည္းျခင္းခံရမႈမ်ား ျပန္လည္စိစစ္ေရး ဗဟိုေကာ္မတီ ) hna ah haotu a tuan. Vawlei hmunhma chuhnak kong le lothlo pawl har tongnak cu ahlan ralkap nih an sawksammi le rak chuhmi a tam caah Pu Henry Van Thio le ralkap kar ah tampi i hmuhthiam lonak a chuak lai tiah an ruah. Asinain amah hruainak in ralkap nih hmunhma a chuhmi hna ekah a sing renglo in khirh thanak zong a tawrelpi khawh hna caah tampi an thangthat. Kawlram President pathum lak ah a min lang bikmi le riantuan a thiam ngaimi a si ti zong in an thangthat. A riantuannak ruang ah upat conglawmhnak caah tiin US hrambunh a simi Global Gateway University zong nih minthatnak Doctor January 2017 ah laksawng an pek.

Rakhine ramkulh buainak ruang ah Kawlram cu vawleicung ram tampi nih sual an phawt. Ram tampi nih Kawlram ah thilcan kong hngalh an duh i Kawlram cozah a riantuanning kong theih a I ngaih lio a si. September 2017 ah kumtin tuah tawnmi UN General Assembly tonpumhnak cu tuah a si. Hi UN Meeting ah vawleicung ram in hruaitu bik Pawl nih an ram kong le hmailei an i timhmi kong biachimnak an ngei cio. Kawlram zong in State Councilor Daw Aung San Suu Kyi cu biachim ding a si nain amah ai-awh in Vice President Pu Henry Van Thio cu zumh ngamhnak he a thlah. American President J. Donald Trump telh in vawleicung ramhruaitu nih biachim an ngeihnak ah Vice President Henry Van Thio cu Kawlram aiawh in bia a chim kho ve. UN General Meeting i hruaitu biachimnak ah Chin miphun nih ram pakhat ai-awh in biachimnak va ngeih hi a um bal lo. Vice President Henry Van Thio nih Kawlram aiawh in bia a chim khawhnak nih Chinmi caah tuanbia a kan tialpiak. Vice President a sinak si lo in 2017 chung ah a riantuannak, a cawlcanghnak pawl hi vawleicung Media nih Kawlram Media zong nih tampi an tial. Zapi nih Pu Henry Van Thio a cawlcannghnak le riantuannak hi cuan le hngalh duh ciomi a si. 2017 kum a cawlcanghnak le a langhnak zoh in News Makers of the Year thimding aa tlak tiah kan ruah caah atu bantuk in The Chinland Post nih kan thimnak hi a si.

__________________________________________

Lal Din Thari


Kawlram ah a voikhatnak tuahmi Samsung Galaxy Star zuamnak ah zapi nih uar ngaimi cu Lal Din Thari a si. Anih hi 2016 Melody World kum 10 tlin zuamnak ah 1st Runner Up a ngahmi a si. 2017 Samsung Galaxy Star nih laksawng a ngahmi cu ks. sing 1000 le ramkip ah laksaknak tuahpiak ding timhtuahnak a ngeihmi Top 5 tiang a phan.


Hi zuamnak cu Kawl hlasak lawng si lo in Miraang hlasak zong papek in an ngeihter hna. Lal Ding Thari hi zuamnak ah Judge pawl nih Mark pekmi ah tambik a ngahmi mizapi nih thimfung pekmi a tlawmte lawng a ngah caah atu bantuk in Top 5 ah a tlak ruangmang nak hi a si.


Hlasak aa zuam chung ah Chinmi tampi nih an bawmh i tha an pek. Chin mi careltu tampi nih le hla a ngaimi nih Lal Din Thari a hngalh lomi an tlawm lai. Media tampi ah an konglam an tial I tha an pek.

Top 5 zuamnak a phak hlan ah Lal Din Thari nih a Facebook in “Zo” mi sin ah lawmhnak tiah ca a tial. Cu a tialmi nih amah tha a petu tampi lila an thin a hungter hna. A ruang cu “Zo” a timi nih Chin timi a kan huap lo. Mizo pawl sin lawng ah lawmnak a chimmi amah tha a petu taktak Chinmi le Kawlram ummi a kan upat lo, thimfung pe ti lo ding tiah a soiseltu tampi an um. Zo timi biafang a hmanmi nih amah thape tu chung ah lungzornak a chuahpi i zatlang ah ceihcumhmi ah a canter. Hi ruang ah thimfung a thlami an tlawm I Top 5 in a tlaknak a si tiah a timi zong an um len. Lal Din Thari zong nih Video Interview ah Zo timi biafang a hmanmi ruang ah ngaihthiam halnak a tuah bantuk in anu pumpak zong nih ngaihthiam halnak ca a tial.

Zei a si paoh ah Lal Din Thari i kum note a si nain a aw a tha. Chinmi tampi a hlasaknak nih a kan hip. Akong zapi nih theih duh le ceihcum ngaimi ah aa chuah. Cu ruang ah Lal Din Thari zong The Chinland Post nih News Maker of the Year ah kan thim hi a si.

___________________________________

Chin Ramkulh Hluttaw Chairman Pu Zo Bawi

Chin ramkulh hluttaw chairman Pu Zo Bawi cu 2017 chung ah thawngpang a sertu bik hna lak ah The Chinland Post nih kan thim.

Pu Zo Bawi nih hin Chin National Army an kuai (an i then) tiah Chinland News sinah a rak chim i cu cu CPA pawl nih CNA/F in a chuak mi kan si kanmah te lawng remdaihnak kong kan ceihpi ve uh tiah Chin ramkulh Cozah phu sinah ca an tial mi kong a rak si. Cucu Chief Minister nih biathli a si rih tiin a theih ter mi kha CNA/F an kuai tak tak sual ahcun Laimi kan ca ah a fak tuk lai. Kawl nih cun thencheu ter an kan duh ko caah hi hna hi an cohlan sual ko hna hnga tiin phanhluannak he ka chim mi a si tiah Hluttaw Chairman nih cun a chim.

Hi kong cu Chin mi dihlak (Lai carel) ti awk nih kan ceih lulh mi le lau pi cio mi thawngpang ah a hun i chuah. Sihmanhsehlaw a tak tak thil a hung fian tik ah kha CPA pawl kha khuazei in an ra i zeibantuk an si zong fiang in hngalh set lomi an rak si ai. Cucu mi cheu khat nih, Hluttaw Chairman nih hin thil fiangfai a hlat hmasa hnu le a hngalh fian hnu lawngah Media sinah a chim awk a si. Cun ramkulh cozah he remdaihnak kong ah hnatlak nak um hmasa loin ramkomh cozah he biaruah khawh a si lo zong a hngalh ko lai lengah CNF le ramkomh, ramkulh cozah an i biakchawnhnak ah hnatlak nak an ngeih mi pawl zong a hngalh awk a si ko nain tiah soisel le kong ceih zong a tong len.

Khat lei ahcun thencheu a phan lai ruangah siaherhnak he a chimmi a si caah cucu a palh in kan hmu lem lo. A biapi ngai mi a si tiin a lawmtu zong um len a si.

Cun Chin ramkulh cu Kawlram chung ah ziknawh eihmuar a tambik ramkulh kan si tiin zapi tonnak ah Hluttaw Chairman nih a chim. Cucu a hnu deuh mizapi le hluttaw palai pawl le Minister pawl tonnak lio zongah CBC USA in a tlungmi Rev. Dr. Thlaawr Bawi Hrin nih a hun chim chap than. Cu lawng hlah Thantlang peng in A Myotha Hluttaw Palai Pu Bawi Khing zong nih, “committee meeting tuahnak ah Chin ramkulh cu ziknawh eihmuar a tam biknak ramkulh kan si ka ti i an khuaruah a har dih” tiah a chim.

Hi hna pawl nih an chim mi hi a thawknak cu Hluttaw Chairman Pu Zo Bawi ka in a si. Khuazei riantuantu nih dah an hlathlai in hmuhchuah mi a si i zeibantuk in dah an hlathlai ning tibantuk bel cu nihin tiang mithmuh kuttongh in hohmanh nih an chim kho lo.

Cu ziknawh eihmuarnak kong cu a hung thang chin lengmang i Chin Ramkulh Cozah phu lei in chimrelnak nawlngei tu Sipin Minister Salai Isaac Khen nih, “hihi a dik tak tak mi a si ahcun zei index in dah an chim mi a si hnga? Cun Cozah rem lo le soisel duhnak men in an chim mi a si ahcun a poi ngai. An bia chimmi hi tuanvo an lak a herh caan a phan te lai” tiah bialehnak a tuah.

Hi kong cu kanmah Laimi chung lawng hmanh ah siloin ramkulh dang dang le ramkomh hluttaw palai pawl sin tiang a phan i 2017 ah linsa ngai in ceih mi thawngpang pakhat a si.

Hi bantuk in Chin ramkulh hluttaw chairman Pu Zo Bawi nih hin Chin ramkulh hluttaw zung saknak kong zongah zeibantuk muisam in kan sak lai timi he pehtlai in thawngpang ngan ngai a rak chuah pi than. Cucu tender lei tuanvo ngeitu he i bawm in engineer nih an suai mi inn a muisam kha hmanthlak he a hun tar tikah zapi lei kap in soiselnak a tam ngai ngai. Chanthar inn lo sak ning he aa tlak ti lo, US Parliament inn cu hi bantuk a si, cu ka ram parliament inn cu hibantuk asi tiin muisam a phun phun hun chuah pi cio le ruahnak chim cio a si. Cu le cangka a zarh chungah Pu Zo Bawi nih a facebook ah Chin Ramkulh Hluttaw zung cu hibantuk in sak a si lai tiah ruahnak pek mi chung in zuk pakhat kha a rak cuan ter. Cu zong cu ceih a tong ngai ngai mi ah a rak i tel. Hluttaw zung cu an sak cuahmah lio a si i Pu Zo Bawi nih hibantuk in a si lai a rak ti mi ning khan a si lai le si lai lo bel cu hngalh khawh a si rih lo. Amah belte kha hmanthlak a rak tar lio ah khan tuanvo ngei a rian tuan ti hawi le tender lei tlangtlatu nih cun zeibantuk in a si lai timi kan fehter rih lo. Kan suai cia mi muisam an duh deuh cio lo caah a tha bik in suai than cu kan i tim, cu vial lawng cu a si ko an rak ti.

Cubantuk te te cun a dang dang social media cung ah siseh, Print media sin zongah hluttaw meeting nan lut lai ti riangmang in a hnu ah luh ter than lo tibantuk, Kaya ramthen in license ngei lo motor an tlaih mi pawl Chin ramkulh cozah budget ca ah cawk ding in kan va zoh tibantuk le nai bik Chin State Development Actors Forum lio ah Chin ramkulh cu Cozah nih a felfai lomi cozah rian tuantu pawl kha dantat nak in kan ram ah an kan thial piak lengmang caah kan sining a tha kho lo, kan rawk, ziknawh eihmuar a tam. Chin ramkulh cu hnawmpung bantuk ah an kan hman tiin a chimmi hna pawl zoh tikah Hluttaw Chairman Pu Zo Bawi hi 2017 chungah thawngpang a sertu bik pawl lak ah aa tel hrim hrim ko tiin kan thim nak asi.+++

Leave a Commnet

%d bloggers like this: