World Paih Championship Ah Rung Lian Ceu Nih Avoi 2nak Champion A Co Than

City Hunter| 2018 February 6| February 3, USA ah tuahmi World Paih Championship ah Rung Lian Ceu nih avoi hnihnak World Paih Championship a co than.

February 3 ah tuahmi World Paih Championship ah paih phunli an tuah. Zatlang paih, pound 160 tang (middle weight) paih, pound 160 cung (heavy weight) paih le World Championship paih an si.

Zatlang paih ah Khuafo khuami Cung Chin Thang nih bual a co. Pound 160 tang paih ah Hakh Khuahlun in Tial Uk nih bual a co. Pound 160 cung paih ah Vuangtu khuami Denmark ram um Tha Cung Lian nih bual a co. Tha Cung Lian cu hi hnu World Paih Championship a um than tikah dengteo (direct) in Rung Lian Ceu he World Paih Championship an i cuh/an i pai te lai.

Denmark ram in paih ruah ah a rak tlawngmi Tha Cung Lian nih cun US ram um pa thawng vialte a tei dih hnu ah atu bantuk in pound 160 cung heavyweight paih ah champion a co hi a si.

“Hi hnu ah paih ruah i US ram k arak kir than tik ahun tih ka nung tuk cang lai. Kei cu zeithil ka tuah poah ah Pathian nih aka umpi, timhtuahnak zong tha tein ka ngei lai. Rung Lian Ceu aa paih ning hi ka zoh i kan i paih te tikah cun kaa fawih tuk te ko lai” tiah Tha Cung Lian nih Rung Lian Ceu theihhngante ah a chim.

World Champion Rung Lian Ceu zong nih, “tukum hi ka chiam cia bantuk in paih kaa tim ti lo nain US Lai pathawng nih Tha Cung Lian cu an tei khawh lo caah kei nih amah cu ka paih ta ko lai” tiah a chim ve.

Tutan World Paih Championship ah Chuncung khua in Kyaw Maung Lian nih a tam bik (minung 7) a tei hna tiah kan theih. +++

Leave a Commnet

%d bloggers like this: