Ye Peng Hnitkayin Khuate Palek Sakhaan KNLA Phufonh Nih An Kah Hna, SAC Ralkap 9 An Thi
The Chinland Post | 2023 June 28 — Mon ram, Ye peng, Hnitkayin khuate ah a um mi palek sakhaan cu KNLA le PDF phufonh nih an kah hna i SAC chungtel 9 an thi tiah Kyapyo phu nih an thanh.
A luancia June 25 chun ah Hnitkayin khua palek sakhaan cu KNLA Brigade 6, B27 le PDF phufonh nih an kah hna hi a si i kahdohnak sml 2 leng a rauh hnu ah SAC ralkap 9 an thi i 1 aa hliam tiah theih a si.
Cu palek sakhaan ah palek an um lo ti nain SAC ralkap 30 hrawng nih hmunhma an khuar caah an kah hna hi a si tiah theih a si.
Palek sakhaan ah kahdohnak a chuah dih hnu in SAC Helicopter Mi 35 pahnih nih Hnitkayin khua lei ah bom an thlak tiah theih a si.
Cubantuk vanlei bomthlak ruang le hriamngan ralkap (317) nih hriamngan an thlah ruang ah Hnitkayin khua minung 3 an thi tiah theih a si.
Hliam a tuar mi 6 hrawng an um i Lamine sizung ah an thlop hna tiah theih a si.
About The Author
