Yinmarbin Peng, Sithuthitkun Pawng Kahdohnak Ah SAC Lei 7 An Thi
The Chinland Post | 2023 August 31 — Sagaing ramṭhen, Yinmarbin peng ah a um mi Sithuthitkun pawng ah kahdohnak a chuak i SAC lei 7 an thi, meithal zuun 1 an lak khawh tiah KLG PDF nih thawng an thanh.
August 29 zinglei sml 10:15am hrawng ah Yinmarbin peng, Sithuthitkun ah mipi ngeih mi thing pawl a fir mi SAC ralkap 35 cu dothlennak phu pawl nih an kah hna tiah theih a si.
Kahdohnak hi mins 15 hrawng a rau i SAC ralkap lei 7 an thi, 7 nak tlawm lo an i hliam. Mipi hriamtlai lei him tein an kir kho tiah theih a si.
Kahdohnak chung ah SAC ralkap nih hman mi MA-11 zuun 1, zaal 1, phaisa bawm 1, Kawlram tangka, Thai baht 50 le sui cheukhat an lak khawh tiah theih a si.
Kahdohnak chung ah ULF Platoon Leader (စစ်ကြောင်းမှူး) Naing Min Oo hruainak in Comrade phu, KLG phu, Alpha phu le adang PDF phu pawl an i bawm tiah theih a si.
About The Author
