May 24, 2024

Zuamcawh Cun Kaa Pai Lai Nain Zatlang Le Group Cu A Caan Ka Zohchunh Te Lai; Rung Lian Ceu

0

City Hunter| 2018 February 17| Tukum Hakha ah tuahdingmi Chin Miphun Ni ah World Champion Rung Lian Ceu cu zuamcawh ahcun paih hrimhrim aa tim nain Zatlang le group i aa paih le paih lo ding kong cu a caan zohchunh te aa tim tiah kan theih.

Hi kong he pehtlai in US in a rak tlungmi World Champion Rung Lian Ceu nih, “Zuamcawh tu cu a ka zuamcawhtu an um caah kaa pai hrimhrim lai. Asinain Zatlang le group paih tu cu kaa paih le paih lo ding a fiang rih lo. Thil sining le caan sining ka zohchunh te lai” tiah The Chinland Post ah a chim.

“Lai lei paih thiam le pathawng pawl hi anmah le sining dirhmun tawk cio in ka upat hna. Asinain, anmah paih ding ah zeihmanh lungretheihnak le thinphan thlalaunak ka ngei lo. Kan i paih tikah fawite in ka tei ko hna lai” tiah a biapeh ah a chimchap.

Lai hlum cheukhat nih pathawng taktak a si ahcun zatlang le group zong ah i pai seh, cu zong i bual a co ahcun World Champion taktak a si lai. Zuamcawh lawng i champion co hi cu pathawng sinak dirhmun taktak a tling lo a titu zong an um ve.

“Tukum Hakha ah tuahdingmi Chin Miphun Ni sunlawihnak ding zatlang paih cu February 19, suimilam 10:00am in zan suimilam 12:00 tiang kan tuah lai. February 20, suimilam 10:00 in minung 5 ah phukhat in a phuphu (group) paih an thawk than lai. A phuphu paih a dih hnu ah zuamcawh paih an peh than lai. Zuamcawh paih ahcun pathawng le paih thiammi minung 24 lawng cohlan le paihter an si lai” tiah Paih Tawlreltu committee haotu Pu Chum Ling nih The Chinland Post ah a chim.

“Zatlang le group paih hi minute 10 chung lawng paihter an si lai. Zuamcawh belte cu minute 10 chung i an i tei lo cun taangkawp (sumtonh) in minute 5 paihter chap an si lai. Cu i an i tei lo sual ahcun aa la hmasa mi le voi tamdeuh aa lami kha teinak hmuhter an si lai. Zatlang paih hi February 19 zan suimilam 12:00 asiloah sml. 11:50 cun aho hmanh paihter an si ti lai lo. Mah lio ah teitu a simi le a thawng bikmi nihkhan bual a co ko lai. Zuamcawh paih hi aa pai bal lo i a thawng lem lomi le zuuri cu paih onh an si lai lo. Aa pai balmi le pathawng timi minung 24 lawng paih onh an si lai” tiah a biapeh ah a chimchih.

World Champion cotu Rung Lian Ceu zatlang ah aa paih le paih lo kong ah paih tawlreltu committee haotu Pu Chum Ling le World Paih Championship haotu Pu Ang Cung nih atu bantuk in an chim.

“Zatlang siseh, group siseh, zuamcawh siseh, aa paih le paih lo kong ah kanmah paih committee zeihmanh I thlaknak nawl kan ngei lo. A duh le aa pai lai, a duh lo le aa pai lai lo, amah nawl a si ko” tiah The Chinland Post ah a chim. Cu bantuk in Pu Aung Cung zong nih hihi, hneknak le forhnak zeihmanh ka ngei lai lo, amah nawl a si ko” tiah a chim.

US paih thawng Uk Ling Thang zong nih, “mizapi nih zatlang ah i pai seh ti an in duhpiak caah zatlang ah naa paih awk a si ko. Cucaah, zatlang ah rak i pai law ti kaan duhpiak” tiah Rung Lian Ceu cu a ti ve.

About The Author

Na ruahning rak langhter ve.. (Leave a comment)

%d bloggers like this: