2018-19 Budget Ah Cikha Inn Paletwa Kar Lampi Khan 90 Chung Pe 18 Kau In Concrete An Phah Dih Lai

City Hunter| 2018 May 18| Chin ramkulh chaklei bik Cikha in Chin ramkulh thlanglei bik Paletwa kar i pehtlaihnak ramkomh lampi cu 2018-19 budget in khan (meng) 90 chung pe 18 kau in concrete an phah dih lai i pe 12 kau in kat-ta-ya lam thar zong an phah lai tiah kan theih.

Vice President Henry Van Thio le ramkomh deputy minister cheukhat hna cu atu hi Chin ramkulh lam le sul pehtlaihnak dirhmun le sining vehvat ah Chinram an tlawn cuahmah lio a si. 2017-18 budget kum ah Chin ramkulh lam le sul lei pehtlaihnak riantuanmi cu Construction zung in General Director U Kyaw Myo Htuat nih fianternak le 2018-19 budget in Chin ramkulh Cikha in Paletwa kar ramkomh pehtlaihnak lampi rian tuan timhmi kong cu Myanmar ramkomh Construction zung in a zungzal chungtel a simi U Win Tint nih May 17, Chin ramkulh Tonzang peng le Cikha an tlawn lio ah atu bantuk in Vice President le Chinram cozah bu hmai ah fianternak a tuah.

“2017-2018 budget in Chin ramkulh ah a biapi bikmi lam lei pehtlaihnak rian kong fianternak a tuah. Cun a biapi bik in Chin ramkulh thlang le chak i pehtlaihnak lampi cu fur thal hlan motor lutchuak kho ding in 2018-2019 budget kum ramkomh chawv in pehzulh in kan tuan chuah rih lai. 2018-2019 budget in Tedim-Tonzang-Cikha pehtlaihnak lampi khan 30 chung siseh, Hakha-Matupi pehtlaihnak lampi khan 30 chung siseh, Matupi-Paletwa pehtlaihnak lampi khan 30 chung siseh, a zapi khan 90 hi pe 18 kau in concrete kan phah dih lai. Cun, pe 12 kau in kat-ta-ya lamthar zong khan tampi kan phah chap fawn lai. Kokek ral ruang ah Kalay-Falam lam a cimh ruang i lam a pitmi tawlrelnak le i runvennak caah lam kauh le retaining wall tuah an tuahciami le tuah an timh chapmi kong zong ramkomh construction zung in a zungzal chungtel a simi U Win Tint nih fianternak a tuahchih.

“Chin ramkulh chaklei le thlanglei pehtlaihak ramkomh lampi a simi Cikha-Paletwa kar hi NLD cozah thar nih fur thal hlan, zei bantuk khua caan paoh ah zalongte in motor lutchuak kho ding in kan tawlrel lai. Concrete le Kat-ta-ya lam kan phah dih lai. A taangmi kum 3 chung ahhin kan tlamhtlinh lai ka zumh. Tlamtlinh ding in kan i zuam cuahmah” tiah Chin ramkulh Lam le Sul lei Pehtlaihnak Minister Pu Sui Thio nih The Chinland Post ah a chim.

Chinram cozah nih ramkulh thanchonak caah a biapi bik papek in rian pathum an tuan. Cucu; Lam le sul pehtlaihnak thatter, Electric mei ngahnak le ramkulh he aa tlakmi cinthlaknak rian thanchoter hi an si. A pakhatnak papek in an tuanmi cu Lam lei pehtlaihnak thatter hi a si caah ramkulh budget in zatuak 52% an hman. World Bank he i bawm in Kalay-Falam-Hakha lam khan 124 cu nylon kat-ta-ya an phah lai. Hi phahnak caah US $ 66.8 million hman ding in hnatlak a si cang. 2018 March 20 ahkhan 2019 October thla ah rian thawk ding in hnatlak a si cang tiah kan theih.

Na ruahning rak langhter ve.. (Leave a comment)

%d bloggers like this: