Hakha Calvary Baptist Church Tower Cu Ks. Sing 850 In An Sak Cuahmah

Salai CungCung|2018 May 17| Hakha Calvary Baptist Church Tower cu ks. sing 850 dih in February 20 in an sak i June hrawngah an dih te lai tiah kan theih.

“Hi Calvary Baptist Church Tower cu February 20 in kan thawk i June 15 hrawng ah dih ding in kan timh. Hi Biakinn Tower saknak ding ah Khrifabu Member pakhat cio nih sing 3 cio thawh in sak kan timh hi a si. Hi saknak ding ah ramchung ramleng bawmhnak a um lo, kanmah khrihfabu chung in thawh cio in kan sak lai” tiah Calvary Baptist Church Chairman Bawi Nawl nih The Chinland Post ah a chim.

“Calvary Baptist Church cu 2006 April 15 ah Bethel Baptist Church in kan rak chuak i Chairman ah keimah Pu Bawi Nawl nih ka rak tuanpiak hna. 2006 April 29 ah Church Council Meeting kan tuah i Church Pastor Rev. H. That Thio, Emeritus Pastor Rev. Dr. Ngun Nawl, cun khrihfa upa zong a thar in minung 12 kan thim than hna. Cu kan rak chuah lio ah cun member hi 114 kan si i Bawipa thangthatnak biakinn kan rak ngeih rih lo caah Chin Oo Sii ramkulh zung pawng Cing Nuai biakinn hlan in kan rak i pum. Asinain 2016 December 10 tiang lawng nan i pum kho an rak kan ti caah keimah hruainak in biakinn cu Pee 50-80 in Chin Oo Sii sang Myanmar Economic Bank thlang ah kan hun sak. Cun kan biakinn kumkhat hnu kumkhat mi kan karh chin lengmang caah biakinn ah kan i tlum ti lo i biakinn kauh pah in le hi Tower cu sak kan timhmi hi asi. Hi Tower cu dotthum in kan sak lai i kan biakinn cu pe 120-50 in kan sak liopi asi” tiah a bia peh ah a chim.

Tu lio Calvary Baptist Church pastor cu Rev. Biak Lian Vel le Church Chairman ah Upa Dar Hnin an si. Pastor Rev. H. That Thio cu 2018 January 18 ah pension an pek i 2018 January 19 ah Rev. Biak Lian Vel cu church Pastor ah an thim tiah kan theih.

Na ruahning rak langhter ve.. (Leave a comment)

%d bloggers like this: