2022 chung ah thawngpang latu 42 thong an thlak hna
The Chinland Post | 2022 December 15 – Kumkhat chung ah Myanmar ram thawngpang latu 42 nak tlawm lo thong an thlak hna tiah New York hrambunh Committee to Protect Journalists i kumkhat chung an report ah an langhter.
A luancia 2021 ah thongthlak a tong mi thawngpang latu 30 an um i a luancia kum nak in tu kum ah minung 12 thong an thlak chap hna.
2022 chung vawlei pumpi ah thawngpang latu pawl thong an thlak mi hna a tam chin tiah CPJ nih a thanh.
Asia ram hna i vawlei cung ah thawngpang latu thongthlak a zual bik nak ram an si i, China, Iran le Myanmar hna hi a cung bik ah an dir.
Atu bantuk in thawngpang latu pawl thongthlak a tam chin lengmang mi nih vawlei pumpi ning in Democracy phung a rawk chin thluahmah ti kha a langhter tiah CPJ Chairman Jodie Ginsberg nih a chim.
Myanmar ram ah hramhram in uknak lak a si hnu in thawngpang latu pawl cu a hlan nak in a let hnih in an namneh hna i tlaih a tong mi pawl zong fak pi in sual an phawt hna tiah CPJ nih a fianh.
Myanmar ram thawngpang latu pawl cazin ning ah hramhram in uknak lak a si hnu ah thawngpang latu 151 an tlaih cang hna i 3 an thah cang hna. SAC nih thawngpang thlahtu Media 13 thlahnak nawl a phih hna.
About The Author
