May 21, 2024

2nk International Conference ah Chin Panel An Tuah Lai

0

TCP Online, 16 February 2018| A voi 2nk International Conference on Burma/Myanmar Studies (ICBMS2) timi vawleicung ram kip in Ramkomh Kawlram kong hlaithlainak tuahmi hna le sianghleirun cachim tampi telh in kum 2 dan ah voikhat tuahmi conference ah Chin Miphun kong nikhat chung chimnak a um lai.

Hi kong he pehtlai in, “Chin miphun le ramkulh kong he pehtlai in Laimi le ramdang mi tampi tel in minung 20 tluk nih Chin miphun kong he pehtlai in hlathlainak an tuahmi chung in an hmuhchuakmi (research paper) an chuahpi lai” tiah Chin Panel Series tawlreltu pakhat simi Salai Sang Hnin Lian nih Chinland Post sin ah a chim.

2nd International Conference on Burma/Myanmar Studies (ICBMS2) hi 16-18 February 2018 tiang Mandalay University ah tuah ding a si tiah kan theih.

Hi nithum chung tuah dingmi ah February 17 nikhat chung hi Chin miphun le ramkulh kong he pehtlai in cathluan tlangtar phun 10 leng an chuahpi lai.

Cathluan chuahpi ding ah a telmi pakhat nih, “a tu bantukin International Conference pi ah Chin miphun le ramkulh kongkau ceihmai le pumpakhat cio nih hlathlainak kan tuahmi cuahpi nak caantha um kho ding in an tawlrelmi chung ah ka tel khawh ve caah ka lunghmuih ngai. A ralaimi nithum chung ah ka ton dingmi hi ka caah hlawknak le thil tha cu a chuahpi hrim lai tiah zumhnak ka ngei. Cun, a hleikhun in zaanghlei cawi in hi Chin Panel a kan tawlrel piaktu cung ahhin ka lawm khun tiah” The Chinland Post sin ah a chim.

Tutan Conference ah Chin Panel an tuahmi hi vawleipi in tuahmi Academic Conference ah a voikhatnak a si tiah kan theih. Chin miphun kong ceihnak ah a tlangpi 4 in an then i, cuchung ah cun tlangtar 13 in minung 20 tluk nih chimrelnak an ngei lai. Cuchung ah, Chin miphun lawng silo in, mi phun dang tampi an i tel.

Cu hnalak ah, a biapi bik in cathluah chuahpitu ding hna cu; Dr Pum Khan Pau, Golan Suanzamung Naulak, Aria Danaparamita, Hlawn Tin Cuai, Flora Bawi Nei Mawi and Rose Par Bawi Zi, Dr. Carl Middleton, Dr. Matthew Yoxall and Thila Min, Sena Galazzi Lian, June Nilian Sang, Lian Bawi Thang, Sang Hnin Lian and Sui Meng Par, Nicola Edwards, Philip Nun Uk Thang hna an si tiah theih a si.

Chin State panel ah chuahpimi hlathlainak cathluan (research paper) vialte hi pehzulh in cauk tiang chuah ding in timtuahnak zong an ngei tiah theih a si.

Hi Chin Panel kong he pethlai in, “tutan hi a voikhatnak Chin miphun kong a biktak in International Conference ah luhpi a si tik ahhin tlamtlinlonak zong tampi kan ngei ko lai. Nain, hmailei ah pehzulh in kan kal khawhnak hi a biapi tuk. Ram chung le ramleng siangkaimi Chin miphun vialte hlathlainak (research) lei ah pehtlaihnak kan tuahnak zong a si ding timhtuahnak kan ngei. A bik in, tulio ah Mandalay ah sianghleirun a kailio mi kan naule le Mandalay ah sianghleirun kip ah cachimh rian a tuahmi zong nih an i tel cio ding hi kan saduhthah a si. Cun, hi kong fiang deuh in a tanglei kan Facebook page https://www.facebook.com/ChinStateResearch/ ah zoh le rel in pehtlaihnak zong tuah khawh a si tiah Chin Panel tawlreltu Salai Sang Hnin Lian nih a biapeh a chimchap.

Tutan a voihnihnak International Conference on Burma/Myanmar Studies (ICBMS) hi a luan ciami 2015 ah Chiang Mai University ah an tuahmi pehzulh a si. Kum 2015 Chiang Mai University, Thailand an rak tuah lio ah, minung 300 lengkai an rak i tel i, tutan zong ah minung tampi an i tel lai tiah theih a si.

About The Author

Na ruahning rak langhter ve.. (Leave a comment)

%d bloggers like this: