Ka Intuar Khawh Ti Lo Ni Ah Ka Rian In Kaa Phuak Lai; Minister Salai Isaac Khen
The Chinland Post| 2018 February 16| Chin ramkulh cozah phu chimrelnak nawlngei a si mi Sipin Minister Salai Isaac Khen nih February 15 ah a riantuannak i a thabatnak kong, cunglei tuanvo pekmi a si ruang ah tlamtlinh aa zuam ko bu, pumpak hlawknak ca ruahchan mi a ngeih lo zia le in tuar khawhnak nih a zawh lo ni ah cun rian in i dinh ding a caah a har lonak kong cu amah pumpak facebook cahmai ah a thlah.
Cozah minung, minister pakhat nih hi bantuk ca a thlah tikah midang pumpak pakhat khat nih a cung i an tuah mi thil, an chimmi bia tibantuk maw asiloah mizapi maw mibu pakhat khat sin in aa ruah ning loin a kong an chim mi tibantuk a um i a si kho tiah a ruat mi zong an um. Cun khat lei ah rian dinh a duh caah pumpak thian cheh nak kawl a si kho men ti zong ruah khawh a si bantuk in party lei in hnek nak pakhat khat maw, ralrin peknak maw tibantuk hna a si kho mi a si.
Sipin Minister nih a pumpak facebook ah kawl ca in a tial mi cu a fiang kho bik in Laica in kan vun leh.
“Siaherh zawnruahnak taktak thinlung pakhat te lawng in zumhnak he pumpak hlawknak kawl lo…a thianghlim bik in nihin tiang rian ka tuan. A hlan ka rian nakin tu hi ka ba deuh, caan zong ka pek deuh i ka lungre zong a thei deuh. A ka zumngamtu nih tuanvo pek ruang ah an nawl zulh dah ti lo zeihmanh ruahchan mi ka ngei lo. Ka intuar khawh ti lo ni ahcun rian ka chuah tak ko lai. Zeihmanh siarem lo ding ka ngei lo. Kaltak sian lo awk in siaherh mi zong ka ngei fawn lo.”
Hi kong ah Chin ramkulh NLD Chungtuan MP Aung Than nih The Chinland Post ah, “party leikap in namchih/hnek (pressure) peknak a um ti cu ka hngal lo. Cunglei hna um hnga dik maw? Cu zong cu a um lai ka zum lo” tiah a chim.
Amah Sipin Minister Salai Isaac Khen pumpak in kan pehtlaih nain aa manh lo caah hi kong ah zeihmanh kan hal kho lo.
Hibantuk in Minister pakhat nih ka intuar khawhnak nih a daih lo ni ahcun rian in ka chuak ko lai, siarem lo ding le siaherh mi ka ngei lo tiah zapi hmanmi zatlang media ah a tar langh tik ahhin a riantuan ti hawi hna sin ah maw cunglei in rian a khinhtu hna sin ah tlerhkhonhnak pakhat bantuk a si caah hmailei ah zeidah a cang lai ti kha mizpai caah lungtur ngai in hngah tlak thil pakhat a si.
Cozah lutlai NLD party chung ah hin anmah le anmah cung lei sinah i reportnak tibantuk le minister mi zeimaw pawl cu rian dinh ding in an kong ceihmai zong an tong pah bal tibantuk zong bia thangvang theih pah lengmang asi tikah tutan Minister Salai Isaac Khen ca thlah mi hi ruah awk thil tam ngaingai mi a si.
About The Author
