A si khomi Federal phung lawng kan pek hna lai General Min Aung Hliang nih a chim

The Chinland Post | 2022 September 29 – Federal phung pek timi cu a si khomi Federal covo lawng kan pek hna lai tiah SAC hruaitu General Min Aung Hliang nih September 27 Naypyitaw ah tuahmi Council Meeting ah a chim. Federal phung a hmangmi ramdang pawl zong cu bantuk in an kal ve ko tiah a chim.

Daihnak kong he pehtlai in tlangcung hriamtlai pawl he a voihnihnak biaruahnak kan ngei lio i 2008 phunghram le NCA zong kha philh awk a ṭha lo tiah SAC hruaitu nih a chim.

Tlangcung miphun kong a hlathlaitu U Than Soe Naing nih cun tlangcung miphun pawl nih an duh/halmi Federal phung si loin amah nih a duhmi Federal phung kha a pek hna lai tiah a ruahdamh.

SAC nih tlangcung hriamtlai pawl hi NUG he an i fonh sual lai ti a phan caah biaruahnak a tuah mi a si tiah U Than Soe Naing nih a chim.

SAC hruaitu General Min Aung Hliang cu September 26 ah NCA ah min a thu lomi tlangcung hriamtlai SSPP, UWSP, NDAA palai pawl he tonnak a ngei.

Tonnak ah SSPP nih cun Burma ram dirhnak le Federal ramkomh dirhnak kong he aa pehtlai mi phung pawl kong ceihhmainak an ngei.

UWSP nih peng ngah khawhnak le NDAA nih mah tein uknak ramri khiahpiak ding in ceihhmainak an ngei.

SAC nih sawmmi daihnak biaruahnak ah NCA min a thumi tlangcung hriamtlaiphu 7 le NCA min a thu lomi tlangcung hriamtlai phu 3 hna cu a voihnihnak tonnak an ngei cang.

Asinain SAC he kahdohnak a fakmi KIA, KNU, CNF, ULA/AA, TNLA le NDAA hna cu SAC nih sawmmi daihnak biaruahnak an kai lo.

Na ruahning rak langhter ve.. (Leave a comment)

%d bloggers like this: