Asian Rampi Karate Zuamnak Ah Saikah Khuami Naomi Nih Champion A Co

The Chinland Post| 2019 June 25| June 23, Yangon, Thuwanna Stadium ah tuahmi Asian ram pumpi (Pacific) championship Karate zuamnak 55KG tang a simi le kum 15-17 kar a simi (Girl under 55KG, Aged 15-17) nu zuamnak ah Thantlang peng Saikah khuami Naomi nih champion a co tiah kan theih.

Hi Asian Pacifice Championship Karate zuamnak ah aa telmi hi ram 11 an si. Myanmar nih intek dirhmun in a hmasa bik tuanvo a lak a si. Hi zuamnak cu anmah le kumkhua hoih in le khing rih zat hoih in zuamnak a phunphun an tuah. Cu chung in nu kum 15-17 kar a si i 55KG tang a simi zuamnak ah atu bantuk in Noami nih champion a co hi a si.

Tutan final ah amah he aa thuami nu cu Noami nih a ke in a lu ah a chuih i chikkhat te ah knockout in a tei colh.

“Naomi hi Thantlang peng Saikah khuami Rev. Dr. Ahramham Ngun Mang fale pahra lakah upa bik a simi Pu Van Biak Lian fanu a si. Naomi hi kum 15 lawng asi rih, Yangon ah taang 8 a kai lio a si. Tutan Asian ramchung Karate zuamnak ah Myanmar ram aiawh in aa zuam i teinak a hmuhmi nih Lai miphun min zong a thatter caah a cung ah kan i lawm taktak. Atu hi kumno te lawng a si rih caah hmailei a lamthluan caah caantha tamtuk a ngei rih. Vawlei cung theih in Chinmi min thattertu a si te lai” tiah Saikah khuami upa pakhat nih The Chinland Post ah a chim.

Naomi a pa Pu Van Biak Lian zong hi a tlanval lio ah Karate lei ah a thiam taktakmi a si tiah theih a si. Naomi hi Karate lei a huammi a si caah a ngakchiatte in karate a cawng mi a si. Cu hlan zong ah Kawlram chung Mandalay, Yangon club dangdang ah aa thua lengmang i min thatnak tete zong a hmu tawn.

Myanmar he hmunkhat ah Tuluk, Australia, Nipal, Russia, Korea ram zaanglekcelhtu hna nih laksawng an co. Atu bantuk in Cuhsin Karate zuamnak hi Myanmar ram ah intek dirhmun in a hmasabik an tuah a si.

Photo: Chinlandtodaynews

Leave a Commnet

%d bloggers like this: