Chin Ramkulh Hluttaw Nih Vuanci Zung Thar Chap Le Chap Lo Ding An Ceih Lai

Tawk Tling Thang| 2019 June 25| June 27-28 ah tuah dingmi Chin ramkulh hluttaw ah vuanci zungthar chap le chap lo ding kong an ceihmai lai tiah kan theih.

Presidet U Win Myint nih ramkulh le ramthen kip ah Milutchuak le Minung Thazaang Hrampi vuanci zungthar chap ding in forhfialnak ca a kuat hna. Sagaing ramthen le Yangon ramthen nihcun chap ding in hluttaw ah an fehter cang.

Hi kong he pehtlai in Chin ramkulh hluttaw Speaker nih, “June 27-28 ah hluttaw meeting kan tuah lai. Tutan hi ceihmai dingmi biatung a tam ngaite. Zei kong dah kan ceih lai timi cu chim awk a tha rih lo” tiah The Chinland Post ah a chim.

MP Dr. Hmuh Thang nih, “Tutan ah Thantlang peng thanchonak caah biahal ding pali nga kaa tim. Tutan hi zei kong dah a kan ceihpi lai cu ka hngal lo. Asinain, atu hi Deputy Speaker (hluttaw haotu chang) kan ngeih lonak a sau tuk cang i tutan ah thimnak a kan tuahpi theu cang hnga lo maw?” tiah The Chinland Post ah a chim.

MP U Aung Taan Deputy Speaker rian in an dinhternak a sau ngai taktak cang. Tu lio hi Chin ramkulh hluttaw ah Deputy Speaker lo in an umnak kumcheu tluk a si cang tiah kan theih.

Chin ramkulh chimnak nawlngeitu Minister U Soe Htet nih, “Tutan hluttaw meeting biatung ah President cakuatmi vuanci zung thar chap dingmi hi aa tel te ko hnga lo maw? Aa tel lai ti cu fiang in ka hngal ve rih lo” tiah a chim.

Hluttaw Deputy Speaker hlun MP U Aung Taan

Chin ramkulh hluttaw nih vuanci zungthar chap ding in biakhiahnak an tuah ahcun ahodah vuanci rianpek a si te hnga? Cun, ahodah Chin ramkulh hluttaw Deputy Speaker ah thim a si te hnga timi Chin ramkhel upa cheukhat an i ceihcum ngai hna tiah kan theih.

Leave a Commnet

%d bloggers like this: